KUSASINDA KWEHLELA KWI-KINGDOM STARS

ISIZODLALELWA eMonti imidlalo kazwelonke yokuhlunga yeSouth African Football Association (Safa) ABC Motsepe League. Le midlalo izoqala mhla ziyisi-5 isongwe zili-10 kuNhlangulana (June). Le midlalo ibikhonjwa eMthatha kodwa kwabuye kwakhalwa ngokushoda kwezindawo zokulala.

IKwaZulu-Natal izomelwa yiThongathi FC kule midlalo njengoba idle ubhedu esifundazweni. Kulindeleke ukuba ihambe ezinyathelweni zeReal Kings United engene kwiNational First Division (NFD) ngonyaka odlule ngemuva kokufinyelela kowamanqamu eBloemfontein.

* IKwaDukuza United izicoshele amaphuzu ingajulukanga igingqela iSobantu Shooting Stars ngoMgqibelo eStanger. ISobantu kayifikanga kulo mdlalo. Izolo ngeSonto iMvoti FC igingqele iKwaDukuza engafikanga emdlalweni obekumele ugijinywe eMdlovana. KUSEMNYAMA kwiKingdom Stars eyithemba leKwaZulu-Natal kwiBrutal Fruit Netball Premier League eqhukeka eCape Town. IStars kayikanqobi ngisho umdlalo wokubika kulo mqhudelwano oqale eThekwini ngeledlule ngaphambi kokufudukela eCape Town. Imidlalo eyandulela owamanqamu nowamanqamu izokuba ngenyanga ezayo eFree State. IStars isidlale imidlalo emine kanti kayikaze inqobe. NgoMgqibelo ibhudluzwe kabuhlungu yiFree State Crinums ngu-5232. Kulo mdlalo iStars bekuvele kulindelekile ukuba ithwale kanzima kwazise iCrinums iyizingqwele zeBrutal Fruit.

Isiyonke imiphumela yale midlalo ihambe kanje: Baobabs 31, Fireballs 74; Flames 49, Jaquars 45; Aloes 30, Southern Stings 66; Baobabs 27, Jaguars 53; Flames 61, Sunbirds 17; Crinums 52, Kingdom Stars 32; Diamonds 10, Fireballs 90; Aloes 36, Crinums 63.