UYABILA ONGOWESI-6 EKONDLISWENI "ISIPOKI"
UYABILA yintukuthelo owesilisa waseMakhonyeni eJozini, enyakatho-mpumalanga yeKwaZulu-Natal, okuvele ukuthi ungowesi-6 kwabesilisa abondliswa “isipoki” ngowesifazane waseHlalanathi khona eJozini. UMnu Sibusiso Ngubane (31), uthi akasoze ayikhohlwa into ayenziwe nguNkz Noxolo Jele (32) omqothule amaphakethe ngoba ethi unengane yakhe kanti usebenzisa eyengoduso yomfowabo athi ngeyakhe.
Uthi uthandane noNkz Jele ngowezi-2014 emuva kwezinyanga ezimbalwa intombi yafudukela oPhongolo, enyakatho yeKwaZulu-Natal iyohlala nonina omncane oshone ngonyaka odlule. Uthi uthole ucingo lukaNkz Jele emtshela ukuthi weqiwe yinyanga (ukhulelwe). Lokhu kuze kwafakazelwa ngunina omncane kanti bacija itulo lokudla imali yakhe.
“Ngizwe uXoloh engitshela ukuthi ukhulelwe ngamnxusa ukuba aye kwa- dokotela ukuze aqinisekise ukuthi ukhulelwe. Akayanga lapho, kunalokho ushuthe incwadi okuhlolwe ngayo ingoduso yomfowabo lapho ibhalwe khona ukuthi ukhulelwe, wangithumelela isithombe sayo ngo-WhatsApp.
“Nami ngigculisekile. Ngokuhamba kwesikhathi, ubeselokhu engitshela ukuthi mangifake imali yokuba aye emtholampilo. Ubengafuni uma ngithi makafike ekhaya nabakubo bezobika isisu. Ngenyanga ye-10 engibikele ukuthi ukhulelwe, ngimbuze ukuthi kungani ingakazalwa namanje ingane wathi uzoya esibhedlela eyobeletha.
“Nangempela ngenze amalungiselelo okuthenga izimpahla zengane. Unina omncane kaXoloh ungifonele engigqugquzela ukuba ngithenge izimpahla zengane eyintombazane ngoba se-kuphele izinsuku izelwe, ise- sibhedlela. Kunesitolo esivulwe ngami edolobheni laseJozini njengoba sithengisa izimpahla zezingane ezihamba phambili.
“Ngibuye lapho ngathatha isikhwama sezimpahla ngathumela udadewethu omncane ukuba azihambise oPhongolo. Ungithumelele isithombe sengane engakehlukanisi,” kuchaza yena.
Uthi ekhaya unengoduso abeseyibikele ukuthi usekhulelisile ngaphandle kwayo. Kuthe uma izwa lokho yaphatheka kabi kangangokuba ike yasikaza ukubopha imithwalo ibuyele kubo.
“Le nto ingiphethe kabi kakhulu ngoba le ntombazane idlale ngami. UNoxolo ngifuna ukumvulela icala lokungigebenga engondlisa ingane yomfowabo. Bengivaleke amehlo ngoba unina omncane nguyena obelokhu engijoja eyifuna la imali yengane,” kusho yena.
Uthi udaba luqale ukonakala emuva konyaka nezinyanga ezimbalwa ingane izelwe ngesikhathi ebuza kudadewabo kaNkz Jele osebenzela kwesinye sezitolo zaseJozini ukuthi ingane isingakanani. Udadewabo kaNkz Jele ushaye izandla watshela uMnu Ngubane ukuthi ungowesi-6 kubantu abathi banengane nodadewabo.
“Ngethukile uma ethi udadewabo akanangane. Baningi kakhulu abantu abondla ingane engekho. Ushutha ingane yomfowabo athi ngeyakhe. Okubi kakhulu wukuthi unina omncane angigile naye uvele washona kulezo zinsuku.
“Kumanje ngiphelile emalini ngoba kwesinye isikhathi bekuphoqa ukuba ngiboleke uma eseyifuna la uXoloh. Ngifuna ukumthathela izinyathelo zomthetho ukuze ezofunda isifundo,” kusho uMnu Ngubane. Uthi ingaphezu kuka-R 5 000 imali ayikhuthuzwe nguNkz Jele.
Ethintwa ngalolu daba uNkz Jele, uthe ingane ngeyakhe kodwa indaba
wukuthi uhlole ulibofuzo kwatholakala ukuthi kakuyona ekaMnu Ngubane, uyise useThekwini. Uveze ukuthi yena ubezitshela ukuthi ngekaMnu Ngubane ngoba ugcine elale naye. Uthe kakuyona ngisho imali etheni uMnu Ngubane amnike yona ngoba wagcina ngokuthenga amanabukeni ( Pam
pers) nezintwana nje ezincane, kwaba wu-R100 amnike wona.
“Ubengakhokheleka nje leyo mali ngoba uma ngibheka kazifiki ngisho ku-R1 000 izinto azithengile. Into nje engingayithandi wukuthi uhamba ebuza bonke abantu abangenalo ulwazi ngalolu daba engabe yena ukhuluma nami” kusho uNkz Jele. Uthe kukuMnu Ngubane ukuthi uyalukhipha yini lolu daba ephephandabeni.
“Anginankinga uma kuwukuthi ubona lokho kuzomsiza. Naye ngathi ukhohliwe ukuthi wayelwa nami elala nami ngenkani engafuni ukufaka ikhondomu. Uma efuna sifikisane kude kulungile, makaqhubeke nakwenzayo mhlwawumbe nami ngizoqhubeka,” kusho yena.