KUYATITILIZWA NONYAKA KUMA-SATMA
KUZOBUNGAZWA impilo yezingqalabutho zomculo wesintu kumaSouth African Traditional Music Achievements Awards (SATMA) ngenhloso yokuqhakambisa amagalelo azo. Lezi zindaba zivele emcimbinini obuseRobben Island, eCape Town ngoMgqibelo, kwethulwa ngokusemthethweni izinhlelo zalo nyaka. Kumenyezelwa ukuthi sebengaqala abathandi bomculo wesintu bathumele imiqhafazo yokuqoka abaculi babo kulo mncintiswano. Ingqikithi yakulo nyaka kuthiwa izobe iqhakambisa kakhulu umsebenzi wamaciko esintu asebenze kanzima ukulwela lo mculo. Linyuke kakhulu izinga lezinhlelo zamaSATMA ngenxa yezindathane zemiklomelo ebekiwe okubalwa izimoto nezindodla zemali kulabo abazokhala bemuke nezindondo.
AmaSATMA azobanjelwa esifundazweni iBokone Bophirima (North West) eMmabatho Convenction Centre eMahikeng kuze kube unyaka wezi-2019. Inhloko yoMnyango wezamasiko namaciko kulesi sifundazwe uNono Bapela uthi bami ngomumo ukwamukela izinkumbi zabantu esifundazweni sabo. Uthi kuyabajabulisa kakhulu ukuba lo mqhudelwano uzungeze zonke izifundazwe ngenhloso yokugqugquzela ubunye. “Sijabule kakhulu futhi sizokwenza okusemandleni ukuthatha lo mcimbi siwubeke ezingeni eliphezulu”, kusho uNono. Kulo nyaka kuzo- shikisha ufudu njengoba ibuyisiwe imikhakha yabasakazi nezintatheli njengoba yayimisiwe ngenhloso yokuhlonipha isilomo somsakazi woMhlobo Wenene FM uSaba Mbixane oshone ngokukhulu ukuzuma engozini yesithuthu ngonyaka wezi-2015. Kunxuswe abathandi bomculo ukuba baqoke abaculi ababathandayo nemikhakha abafisa baqokwe kuyona njengoba bevulwe ngoMgqibelo olayini kanti abaqokiwe bazomenyezelwa mhla zili-12 kuNcwaba (August). Umsakazi ozodla umhlanganiso ubekelwe imoto kanjalo nowesiteshi somphakathi nalowo ozokhala emuke neSong of the Year ngokunjalo novote kakhulu. Abazohlomula ngezindondo bazoklonyeliwa ngoR20 000. Kubuye kwengezwa nemikhakha emisha oku-yiBest Traditional TV Programme neBest Cultural Programme, Loyal Listener (ozotetemuka ngohambo lokuya phesheya kwezilwandle). Ukuqoka umculi omthandayo, uthumela igama elithi SATMA, umkhakha omuqoka kuwona negama lomculi bese uthumela ku:34066.
Omunye wabaculi obeyingxenye yalo mcimbi uBuselaphi Gxowa uncome kakhulu ukuqhakambiswa kwezingqalabutho.
Uthi kubalulekile ukukhumbuza abantu ngomsuka walo mculo. “Kungangijabulisa ukubona amaqembu afana naMatshitshi amhlophe enikezwa indawo yawo ngoba abukeka ecindezelekile kuzona zonke izindawo eziphakamisa thina besifazane kanti siyawahlonipha kakhulu” kusho uBuselaphi.