Kuqothane umndeni usolana ngokuloya
Ababili badonsa odilikajele
USULAHLE ithemba ngokuthi uyoke wakhelwe umuzi wawo oshe ngesikhathi uhlaselwa umndeni wakwaMncwabe eMabheleni, eMthwalume, ogwini oluseningizimu yeKwaZuluNatal esigamekweni okushone kusona amalunga awo ayisi-8 ngowezi-2015.
Lo mndeni ohlaselwe ngabozalo lwawo, kwagencwa amalunga awo ngoba usolwa ngokuthakatha, uthi kawusaboni ukuthi uyoke usizakale.
Ngesikhathi kufihlwa la malunga ashone kulesi sigameko - okunguMnu Mantinga Mncwabe (72), uNkk Shonisile Mncwabe (59), uNontobeko Mncwabe (35), u-Amahle Mncwabe (12), u-Amanda Mncwabe (15), u-Andile Mncwabe (1) u-Aphiwe Mhlongo (3) noPhilasande Mncwabe (2) - umndeni uthenjiswe wuMasipala waseMzumbe ukuthi uzowulekelela ngokuwakhela.
Emuva kophenyo lwamaphoyisa ngokubambisana noKlebe, kugcine kuboshwe uThulani Mncwabe noSbonelo Mncwabe okuyimanje badonsa odilikajele. Kuzokhumbuleka ukuthi
ILANGA libike kabanzi ngalolu daba ngesikhathi kuhlaselwa umndeni wakwaMncwabe. Ababulali kubikwe ukuthi bebesola uMnu Mncwabe - onguyise omdala wabo - ngokuthakatha, emuva kokuba kushone ingane yakubo encane.
Kubikwe ukuthi emuva komngcwabo, bathathe ocelemba bayohlasela kwaMncwabe maqede bathungela umuzi ngomlilo.
UMnu Mlungisi Mncwabe, oyilunga lomndeni, uthi ngelanga lomngcwabo umasipala wakule ndawo umemezele ukuthi uzobakhela umuzi, bona nje okumele bakwenze wukufuna indawo.
Uthi basukile eMabheleni njengokuyalelwa wumasipala, bakhelwa imijondolo emithathu obekuthiwa mabalindele kuyona.
"Namanje basahleli kule mijondolo uMnu Mncwabe athi kayikho esimeni esihle njengoba inetha uma izulu lina.
“Sekuze kwaphela iminyaha emibili silindile, namanje kusathulekile sisampintshene kule mijondolo emithathu. Siyile khona siyobuza ngoba sibona kuqhubeka isikhathi kuthulekile.
"Sitshelwe ukuthi masilinde kuzoqala maduze ukwakhiwa komuzi.
"Kuqhubekile kwahamba isikhathi saphindela khona kwamasipala. Sitshelwe ukuthi masibhale incwadi sichaze udaba lwethu. Kusixakile lokhu ngoba bayazi ukuthi sisuke kanjani kanti yiwona umasipala owasibeka kule ndawo okwakuthiwa masilinde kuyona.
"Inkinga enkulu wukuthi sibaningi ekhaya, imijondolo esibekwe kuyona iyanetha, kasikwazi ukuhlala kahle njengabo bonke abantu. Siyakuqonda ukuthi umasipala uyasilekelela kodwa kumele saziswe ukuthi kuqhubekani. Sike sezwa kuthiwa sezifikile izinto zokwakha kodwa namanje kusathulekile,” kusho yena.
Okhulumela uMasipala waseMzumbe, uMnu Trevor Khanyile, ucele ukuthunyelelwa imibuzo ngalolu daba. Ephendula uthe: “Kubalulekile ukuba ngicacise ukuthi kakusiwona uMasipala waseMzumbe owathi umndeni mawusuke endaweni (ohlaselwe kuyona) nokuthi uzokwakhelwa umuzi omusha kodwa yiwona umndeni owacela ukwakhelwa.
"Mangicacise futhi nokuthi njengoba isehlakalo sithatheke njengenhlekelele, uMasipala (wesiFunda) uGu, ungenelele wanikezela ngosizo lokuqala lapho kwenzeke khona inhlekelele.
"Thina njengohulumeni, ebesikwenza wukunizeka umndeni umpheme wesikhashana ukuze ufihle ikhanda. Kalukho uhlelo lokwakha izindlu kumasipala, zakhiwa wuhulumeni wesifundazwe.
"Ngizocela nithinte uSomlomo kaMasipala, uNkk Fikile Gumede uzosho zonke izinto umasipala owazenzela lo mndeni," kusho uMnu Khanyile.
Ethintwa uSomlomo Gumede izolo ngeSonto ucingo lwakhe belukhala kodwa lungabanjwa.