Ukuzivoca kwehlisa umfutho wegazi
Nakuba isike yathintwa indaba yesifo i- hypertension - high blood pressure - okusho umfutho wegazi oweqile, nokho kumqoka ukukhumbuzana ngayo njengoba ngoLwesithathu olwedlule kade kuyiWorld Hypertension Day.
Ukuqoshwa komhla zili-17 kuNhlaba (May) ukuba kuxwayiswe abantu emhlabeni ngalesi sifo, kukhombisa ukuthi siyingozi kangakanani. Inkampani eyaziwayo futhi enezibhedlela zakwanokusho ezizimele ezifundazweni eziyisi-7 kweziyisi-9 eNingizimu Afrika, iLife Healthcare, ikhiphe incwadi ejikelezayo yombani njengendlela yokuphonsa esivivaneni kulo mshikashika wokuxwayisa ngengozi ye- hypertension.
Kuleyo nhlabamkhosi kugcizelelwa iphuzu lokuba umuntu adamane eyohlola umfutho wegazi ukuthi usesimeni esihle na. Phela i- hypertension lena ivamile kodwa noma kunjalo, umuntu uyahlala nayo ingabonakali.
Uma lokho kuqhubeka isikhathi eside, imithambo yegazi nenhliziyo kungalimala bese umphumela walokho kube wukumelwa yinhliziyo, wunhlangothi, isifo sezinso nokungaboni.
UDkt Vinod Thomas ongungoti kwezezifo zenhliziyo eLife Vincent Pallotti Hospital, uthi: "Ngisho izimpawu zingekho, lokho kakusho ukuthi kumele abantu bangakhathazeki."
SIBANGELWA YINI?
Lesi sifo sibonakala ngomthamo wegazi inhliziyo yakho elimpompayo nokuminyana kwalo emithanjeni elithumela ezingxenyeni zonke zomzimba.
Uma inhliziyo ishaya kakhudlwana ukufeza lesi sidingo, futhi iya ngokucinana imithambo, uyenyuka umfutho wegazi. Abantu abayizi-6.3 million eNingizimu Afrika abanalesi sifo benza leli libe ngelinye lamazwe anezinga eliphezulu kakhulu lalesi sifo.
Izibalo ziveza ukuthi bali-130 abantu abamelwa yinhliziyo nabangama-240 abashaywa yisifo sohlangothi njalo ngosuku. Lokhu kusho ukuthi abantu abali10 bashaywa wunhlangothi, abayisihlanu bamelwa yinhliziyo njalo ngehora kuleli lizwe.
Ngenhlanhla i- hypertension kulula ukuyibona. Uma sewazi ukuthi unayo, ungasebenzisana nodokotela wakho ukuyilawula. “Kusukela eminyakeni yobudala eli-18, kubalulekile ukuba okungenani kanye njalo emuva kweminyaka emibili ucele kudokotela wakho ukuba afunde izinombolo zomfutho wegazi kuwena.
"Uma unayo ube ungaphansi kwale minyaka noma uma usuneminyaka yobudala eyevile kwengama-40, udinga ukukwenza lokhu njalo ngonyaka," kusho uDkt Thomas.
Kuya ngemiphumela-ke, kodwa udokotela wakho kusenokwenzeka akunikeze uhlu lwemithi okumele uyisebenzise ukuze ulawule umfutho wegazi lakho. Kubalulekile ukuqhubeka nokuyisebenzisa leyo mithi.
“Iningi labantu liyayiyeka imithi uma selizizwa lingcono kantike liba ngcono nje kungenxa yaleyo mithi‚" kusho yena. Kukhona ongakwenza kanye kanye nokusebenzisa imishanguzo okungakusiza ekwehliseni umfutho wegazi.
ONGAKWENZA UKUVIMBELA I-HYPERTENSION
Izaba ongazenza ukuqiniseka ukuthi ukwenyuka komfutho wegazi kuyalawuleka noma kuyavimbeka, phakathi kwazo ungenza lokhu okulandelayo:
Yidla ukudla okunesilinganiso esifanele sezakhamzimba futhi okungenasawoti noma ofakwe kancane.
Nciphisa ophuzweni olunamandla, uwuyeke gelekeqe ugwayi. Hlala uzivocavoca. Gcina isisindo sakho sisezingeni elifanele.
Vakashela emtholampilo ukuyobheka umfutho wegazi njalo ngonyaka.
YAZI ISILINGANISO ESIFANELE
Uma umfutho wegazi ungaphansi kwe-120/80, lokho kusho ukuthi unomfutho wegazi ofanele.
Uma umfutho wegazi ungaphansi kwe-140/90 kodwa ungaphezulu kwe-120/80, usengozini yokuba nomfutho wegazi oweqile esilinganisweni esifanele.
Uma umfutho wegazi ungaphezulu kwe-140/90, udinga ukubonana nabezempilo ukuze uthole ukuthi usunayo yini i-hyertension, uthole usizo lokwelashwa ukuze ugweme esenhliziyo nonhlangothi.