UKHONJWA KWI-CHIEFS OXABENE NE-PMB UTD
SIVEZA okushaqisayo isikhulu seMaritzburg United ngomdlali osemiswe izinyanga ezingaphezulu kwezine engazihlanganisi nale kilabhu ngenxa yokunqaba ukwelula inkontileka.
IMaritzburg ike yaba nomdonsiswano noPhilani Zulu odlala esiswini kule kilabhu ifuna elule inkontileka kodwa yena enqaba.
Kuthiwa bekubangwa indaba yemali.
IMaritzburg inqume ukumuqhelisa eqenjini kodwa ibe imholela.
Ujima neMaritzburg City kaBongi Hlophe elolongwa nguAndile “Sguda” Cele.
Leli phephandaba lishayela uFarook “Ntshebe” Kadodia ongumnikazi weMaritzburg emuva kokuzwa ukuthi le kilabhu ihlela ukumnika amaphepha amkhululayo uZulu uvele waveza okushaqisayo.
“Inkontileka kaZulu nathi iyaphela ngenyanga ezayo ngakhoke amaphepha akhe sizowanikeza ikilabhu yakhe entsha.
Imithombo yami ebisebenza naye uZulu ingitshele ukuthi usesayine inkontileka yesibambiso neKaizer Chiefs.
Kuyangixaka ukuthi iChiefs ibimyekelani ahlale sonke lesi sikhathi ngoba besizoyinika yena ukube ibiza kithina.
Iyinkinga lento yamakilabhu amakhulu ahlale efuna ukuthola abadlali mahhala.
Kodwa-ke akukho engingakusho isimo sakhe sisenjalo nje kuze kube kuphela inkontileka yakhe nathi,” kusho uKadodia.
Limbuza leli phephandaba ngehlazo abhekene nalo njengoba indaba yale kilabhu isematheni yokuthi baholela uSiphesihle “Mbesuma” Ndlovu odlala esiswini uR7000 oseluzwe lwangenelwa nayinyunyana yabadlali bakuleli ikhala ngokuthi lo mfana uyaxhashazwa uthe:
“Abantu abaqondi ukuthi kwenzakaleni ngakho-ke angifuni ukulokhane ngichaza izinto eziningi.
Empeleni inyunyana yabadlali ayizange izixake ngokuza kithina izobuza ngoba sinazo izincazelo.
Kodwa-ke abantu abakusho abakuthandayo kodwa uNkulunkulu uyazi ukuthi angisoze ngaxhaphaza omunye umuntu,” kusho uKadodia obezwakala ukuthi uphatheka kabi.