Isiqalile imingenelo yomjaho weNational Youth Run
SEYIQALILE ukwamukelwa imingenelo yeNational Youth Run 10km ezokuba ngoMgqibelo mhla zintathu kuNhlangulana (June) kusuka ngo08h30 eKings Park Rugby Stadium.
Lo mjaho wandulela iComrades Marathon ezokuba ngakusasa ngeSonto lomhla zizine kuNhlangulana isukela eThekwini isongwe eMgungundlovu.
IYouth Run ihlelwa umnyango WezeMidlalo waKwaZulu-Natal oholwa nguBongi Sithole Moloi ngenhloso yokufaka ugqozi lokugijima kulabo abangakakwazi ukwenza ibanga lika-90km.
Izokube ihlukaniswe izigaba ezimbili i-5km ne-10km. Abafuna ukungenela bangaya ehhovisi lezokugijima lesifundazwe eKings Park Athletics Stadium ukuthola amaform.
Kwi-10km kuzokwamukelwa abasubathi abaneminyaka eli-14 ubudala ngosuku lo mjaho kube ngeyisi-9 kwi-5km.
Izingqwele zizohlomula ngo-R1 000 kubo bobubili ubulili kwi-10km kanti isikole esizokuba nabasubathi abaningi sizohlomula ngemiklomelo econcisa amathe.
IKwaZulu-Natal Athletics yazisa abasubathi ukuthi izogcina ngoLwesihlanu mhla zimbili ukwamukela imingenelo.
Ithi ngeke ikhishwe imingenelo ngosuku lo mjaho. Ngolunye ulwazi kungathintwa iKZNA kwethi: 031 312 9374.
Imiphumela yeBrutal Fruit Premier League: Baobabs 28, Flames 49; Jaquars 55, Kingdom 40, Baobabs 36, Stings 60, Fireballs 67, Kingdom Stars 29; Crinums 40, Flames 54, Diamonds 31, Sunbirds 49; Aloes 28, Fireballs 76.