Ayashabalala amathemba abafundi abangafundi
Kuxoshwe uthisha ngenxa yeziqu
BAKHIHLA isililo abafundi ngokuncishwa imfundo eMphezeni Secondary School, KwaNyembe, eShowe, enyakatho-mpumalanga yeKwaZulu-Natal ngenxa yokungabi naye uthisha wezifundo ezimqoka.
Laba bafundi bakhala ngokungabi naye uthisha weSayensi neMaths okubikwa ukuthi uxoshwe kuqala unyaka ngenxa yokungabi nazo iziqu zobuthishela kuthiwa ubefundisa ngeNated Course.
Umfundi oxhumane neLANGA, uthi sikhulu isililo esikoleni ikakhulukazi kubafundi bakamatikuletsheni njengoba lo thisha oxoshiwe ebefundisa lezi zifundo kusukela kwaGrade-10 kuze kuyovala kwaGrade-12. Uveze ukuthi nakuba ebengenazo iziqu lo thisha kodwa bebemuzwa kakhulu futhi enalo ikhono lokufundisa.
Uthi lesi sikole sisezinkingeni ezinkulu kwazise kasinaye nothisha we-Accounting. Lolu daba baludlulisele kumhloli wabe ese- phakamisa ukuba makubambe omunye uthisha wangaphakathi afundise iMaths kwabe sekuvela ukuthi abafundi kabanelisekile ngokufundisa kwakhe.
“Uthisha uhambe ngoNhlolanja (February), sahlala isikhathi eside singafundi. Kubanjiswe omunye uthisha obefundisa amabanga aphansi iMaths, iyamhlula. Ngesikhathi kubhalwa izivivinyo zesigaba sokuqala sonyaka, kayikho into esiyibhalile ngoba ubesasifundisa into yakwaGrade 11.
“Kayikho into esiyihlalele lapha esikoleni, sihlukumezekile njengoba unyaka uhamba ngesivinini singakaze sifunde lutho. Sizobhekana kanjani nezivivinyo ekupheleni konyaka uma kuze kushaya lesi sikhathi udaba lwethu lungasukunyelwa?‚" kusho lo mfundi.
Uthi bayahlangana babengamaqoqo bazifundise bona ngezimpelasonto nakuba bengazi ukuthi abakwenzayo kuyikhona yini. Uveze nokuthi sebefisa ukufakwa kwezinye izikole kuze kube kutholakala othisha abazofundisa lezi zifundo. ILANGA lithole ukuthi lesi sikole kasinaye uthishanhloko, kubikwa ukuthi usule kuwona lo nyaka, okwenza kube nezinkinga kwazise kunombango osha phansi.
Induna yendawo, uMnu Zakhele Mthimkhulu, ithi lolu daba lubikiwe kuyona ngabazali bezingane. Ithi wudaba olungawuphethe kahle umphakathi ngoba abafundi bayalubika emakhaya bethi banovalo lokufeyila ekupheleni konyaka.
“Izingane zifuna yena lo thisha ongenazo iziqu kanti-ke umhloli uthe kuyaphambana nomthetho wezemfundo. Ubethembisile ukuthi uzozama ukuthola othisha abazofundisa lezi zifundo kodwa namanje kusathule. Abazali sebecele umhlangano ophuthumayo esikoleni bathi mazikhishwe izingane zifunelwe izikhala kwezinye izikole,"kusho uMnu Mthimkhulu.
Okhulumela uMnyango wezeMfundo KwaZulu-Natal, uMnu Sicelo Khuzwayo, uthi bazongenelela ngokukhulu ukushesha ngoba kabakwazi ukugoqa izandla esimeni esifuze lesi.