VUKA UZITHINTITHE:
NJENGOBA sisenyangeni yentsha nje, ngiyathanda ukuba sixwayisane futhi sivulane imiqondo ukuze sikhule kahle singabantu abasha. Kufanele singakhohlwa ukuthi umuntu empilweni unezigaba ezintathu.
Esokuqala ngesokuzalwa, esesibili ngesokuba ngumuntu omusha esesithathu ngesokuba mdala - angithandi ukukhuluma ngesokufa ngoba akekho-ke osifisayo nosithandayo.
Lesi sigaba esikusona sokuba ngumuntu omusha, singekubalekele ukuthi yisona esimqoka kunazo zonke futhi siyisisekelo sokungena ekubeni mdala. Isigaba sokuba musha siyedlula futhi sifushane okusho ukuthi kufanele ubuphile ubuphilisise ubusha bakho.
Yingakho namanje ngigcizelela ukuthi isigaba sokuba musha sibalulekile ngoba ubuhle nobubi bempilo yakho bulele kusona, ikakhulukazi izinqumo ozithathayo ngempilo yakho. Bonke abantu abadala bayimiphumela yezinqumo abazithatha besebasha.
Ebusheni bethu siyatshala ngezinto esizenzayo. Ukuba bekuthiwa mangikhulume njengomfundisi, bengiyothi singakhohlwa ukuthi iBhayibheli lithi hlonipha uyihlo nonyoko ukuze izinsuku zakho zande ezweni. Inhlonipho nje iyodwa iyokwenezela ukuba ungafi umncane.
Abanye bethu kabanabazali, ngikhuluma nje umzali wakho mhlawumbe wagula washona ngenxa yesifo senhliziyo.
Abanye abazali bethu bakhushukelwa wushukela bashona kodwa-ke kubuhlungu ukuthi ezinye zezinto ezabulala kwaba yingenxa yethu, mhlawumbe nje kungenzeka ukuthi kasazanga ukuthi isizathu sokufa kwabo yithina.
Mhlazana unyamalala izinsuku umzali wakho engazi ukuthi uyephi, mhlawumbe sikhona isifo esamphatha.
Ukhulelwa umncane, uyakhulelisa umncane, udla izidakamizwa umncane, uyadelela kawulaleli umncane, lezo zinto singakhohlwa ukuthi ziyabahlukumeza abazali bethu. Kakulaleki kahle ebusuku kubazali uma bezele ingane engalaleli.
Ukuba bekuthiwa ngiyagqugquzela, bengiyothi ukuze uphumelele uma ungumuntu omusha, zintathu izinto okufanele uzazi eziyokwenza umuntu kusasa futhi nje cishe impilo yonke yomuntu incike kulezi zinto ezintathu.
Okokuqala hlonipha la uvela khona - ake sithi hlonipha la uzalwa khona - okwesibili zimisele ungadlali la ukhona, okwesithathu ungakhohlwa la uya khona. Yonke le nto esesiyixoxile engakusiza ungumuntu omusha, izalwa yinhlonipho ikakhulukazi ekuhlonipheni abantu abadala.
Abantu abadala uma kuthiwa masibahloniphe, kushiwo ngoba bayakwazi ukuba basha, babile ngangathi ngeminyaka, thina kasikaze sibe ngangabo.
Uyoze ufe ungabanga untanga womuntu omdala kunawe. Masibuphile ubusha bethu kodwa sigade impilo ingasidli sibancane. Singabantu abasha kasikwazi ukuhlukanisa phakathi kwe- life ne- knife, futhi kasikwazi ukuhlukanisa phakathi kwama- niknaks neRattax.
Ugade ungathi udla impilo kanti impilo idla wena.
Uboyibheka empilweni into othi uma uyidla kodwa kuzace wena kugcine sekumbulwa kwembeswa emashidini. * Uma ufuna ukuthola uMfu Zondo bukhoma, vakashela ibandla lakhe njalo ngeSonto ngehora le-10. Siku-110 Williams Road uma usuzofika eDalbridge Train Station. * Kubo bonke abafundi bephephandaba lethu ILANGA, siyafisa ukuba sisizane futhi ngiyafisa ukuniphendula nonke ngebhadi ucingo noma inombolo iyodwa ngakho akululanga ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni. *UPastor Sthembiso Zondo ngumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA LangeSonto. Abafuna ukuxhumana noma ukummema, inombolo ithi: 073 795 2292. Ungamshiyela nomyalezo kuFacebook: Sthembiso Zondo Fan Page noma kuWhatswApp: 082 070 8034
Inhlonipho nje iyodwa iyokwenezela ukuba ungafi umncane.