Bekuyindumiso yodwa e-African Gospel
UKHULA ngamandla umsebenzi weNkosi e-African Gospel Church, eWaterloo, eVerulam, enyakatho yeTheku phansi kukaMfu Nkosinathi Petros Zungu nowakwakhe, uNkk Nompumelelo Zungu.
Bekusha indumiso, kuthandazelwa abantu kusho intshumayelo. Umshumayeli Zazi Ntuli unikwe ithuba lokudlulisa amazwi ngalo lonke uhlobo lokuhlukumeza oludla lubi kulezi zinsuku.
Uzibongele ngokukhululwa nguJesu Kristu ngoba uzizwa ebusisiwe naphezu kokuba abantu abanebala elimhlophe njengaye bebulawa kulesi sikhathi.
Uzwakalise ukubazwela labo abanjengaye kodwa abangakamtholi uJesu. Kule nkonzo kushumayele umshumayeli Bongumusa Msane oqale ngokufakaza ngohambo lwakhe evangelini. Uthe yena waluqala esemncane esahamba nomama bomthandazo wangoLwesine. Udlulise isifiso asizwa emoyeni wakhe ngalesi sikhathi soku- ba kufike obusisiwe ngengcebo akhele ibandla laseWaterloo indawo okungeyalo njengoba manje lisakhonzela esikoleni. Intshumayelo yakhe ebigxile ezi-nsukwini zokubuya kweNkosi uJe-su, ubeyisekele ngesifundo esitha-thwe encwadini II KwabaseThesa-lonika 2:1-7. Uyendlalele ngokuthi kuthathu akuqaphelayo emabandleni ngalezi zinsuku, kakusakhulunywa ngensindiso, okwesibili ngokuvuka kukaJesu Kristu ekufeni okwesithathu ngokuthi uzobuya masinyane.
Uthe esikhundleni salokho kuthenjiswa abantu izinto ezibonwa ngamehlo, wengeza ngokuthi yena akezile ukuzonqakisa abazalwane izinto.
Uqagule ukuthi ngaphambi kokuba umphikikristu oyokwambulwa ngaleso sikhathi aziveze, kuyomele lokho kwandulelwe wukuntenga kwemibuso yamazwe ngamazwe nomnotho wawo yikhona kuyokuba nesizathu sokuba kwakhiwe uhulumeni womhlaba oyokuba nomholi oyedwa, nohlelo lomnotho oluyosebenzisa imali eyodwa.
Uqhubeke wathi onombuzo wokuthi umuntu oyedwa angawulawula kanjani umhlaba wonke, makabuke ubuchwepheshe osebukhona njengenkomba yokuthi lokhu kuzokwenzeka. Wayesethi lokho kuyobe sekuyisiqalo sokungenisa uphawu luka-666 okukhulunywa ngalo encwadini iSambulo. Emuva kwale ntshumayelo, kube sekuvulwa isigaba sokukhulekela intombazane ebifike noyise ukuba ikhulekelwe.
Lo msebenzi ubuwenganyelwe nguMfu Zungu owaziwa ngesipho sokuthandazela kukhululwe ababanjwe ngomoya ababi. Kuvele ukuthi umoya wokukhonza uSathane oke wabhilita eminyakeni embalwa edlule wona kawuphelile.
Isindile intombazane efike noyise ukuzokhulekelwa ebifuna ukubulala abazali bayo, yagonyuluka kwaphuma amaconsi egazi.