Inkulumo yoNyazi ingawaxova amaNazaretha
INKULUMO yomholi webandla lamaNazaretha ohlangothi lwaseBuhleni, uMduduzi “Nyazilwezulu” Shembe obekhala ngabesilisa abathile bebandla okusolwa ukuthi bangophoshozwayo, bakhipha izindaba zebandla bazenekele abezindaba, iyethusa. Kunenkulumo yalo mholi olandelwa yizinkumbi zabantu, esisabalele egqugquzela amalunga ebandla lakhe ukuba angabe esalithenga nelinye iphephandaba lesiZulu ngoba akazi ukuthi amdlelani, akaboni ukuthi uyowaxolela ngoba aqala kuyise, iNkosi Vimbeni “uThingolwenkosazane” Shembe.
Akagcinanga lapho, kuthiwa utshele labo abasolwa ngokuba ngophoshozwayo ukuba uma kuwukuthi bathanda ukuyokhonza ohlangothini lwamaNazaretha aseThembezinhle aholwa yiNkosi Vela “iMisebeyelanga” Shembe, nawaseGinyezinye aholwa yiNkosi Mudliwamafa Sizwe Shembe, mabashone khona.
Yize uNyazilwezulu lushilo ukuthi luyawathanda amalunga aleli bandla kodwa, sibona ukuthi amazwi afuze lawa kumuntu ongumholi wezenkolo azokona izinto. OkaNhlanzi ubukeka naye enza ngqo lokhu akhala ngokuthi kwenziwa ngamadoda athile ebandla yize bekwenza ngezindlela ezingafani.
Sicabanga ukuthi lo mholi uyabazi abantu abaholayo ukuthi baziphatha kanjani ezintweni ezikhombisa ukufenyisa igama lakhe, ngakho le nkulumo ibukeka kuyiyona ngqo ezohlakaza ibandla, idale nodungunyane olungenasidingo kodwa yena ebe ebuka ngaphesheya.
Empeleni yinkulumo yosopolitiki le hhayi yomholi webandla okuleli zinga lakhe.
Siyaqonda ukuthi inhliziyo kayiphakelwa, kodwa noma kunjalo, ukukhipha amazwi athi kawuboni ukuthi abantu uyobuye ubaxolele, uthumela umyalezo wenzondo kwabanye abantu.
Kasimehluleli uNhlanzi kodwa njengomholi wezinga lakhe, sibona ukuthi lolu daba ubengalungqumuza nabefundisi namakhosi akhonza ebandleni lakhe, kulungiswe lolu daba ngoba njengoba sekungena amagama abaholi bezinye izinhlangothi, sibona ingonakala iphele nya indaba.
Uyaziwa umlando ongemuhle waleli bandla kusukela ngonyaka we-1976 ngakho-ke kasifisi ukuba ukubhekana ngeziqu zamehlo kulezi zinhlangothi kuqhubeke. Yize abantu baseNingizimu Afrika - kakhulukazi KwaZulu-Natal - bengewona amaNazaretha bonke, kodwa kuyiqiniso elingephikwe ukuthi ubuNazaretha ngenye yezinto ezinhle ezifike ngomuntu omnyama emhlabeni. Kungaba kubi uma isiphela iqedwa yibona futhi abantu abampisholo ngoba nje bengaboni ngasolinye.
Siyawanxusa nawo amalunga aleli bandla ukuba ayiphathise okwezikhali zamaNtungwa le nto ayinikwa nguMprofethi Isaiah Shembe, ayeke nawo ukuchaphana ngezinhlamba ezinkundleni zokuxhumana. Uma-ke abaholi kuyibona abazokhombisa intukuthelo esidlangaleni, iyophela kanjani inkinga yokunwephulana nokuchaphana ngezinhlamba ezinkundleni zokuxhumana?
Njengoba sike sasho, kasimbetheli okaNhlanzi kodwa njengomholi kumele azi ukuthi izwi lakhe - kungabe lihle noma libi - kodwa kubantu abaholayo kusuke kuyizwi abangasebenzela phezu kwalo ukwenza noma yini. Njengoba amaNazaretha embiza ngonkulunkulu lo mholi, kufanele ngabe uyakuqonda ukuthi izwi lakhe lifana nomlilo ezinhliziyweni zawo.
Njengoba nesiZulu sisho nje ukuthi nenkosi iyahletshwa, njengoba kwenzekile-ke kwaba khona abahlebela abezindaba okwenzeka ebandleni, kasiboni ukuthi lokho bese kufanele bajojwe ngenxa yakho kodwa sibona ukuthi bekufanele ubuholi bebandla buhlale buyibhunge ekhosombeni le ndaba ukuze ingadali umoya ongemuhle emalungeni ebandla, abone sengathi kuhlaselwa uNyazilwezulu bese ethatha izinqumo ezingaqhubezela ukuba leli bandla litheleke ngehlazo.
Kasimehluleli okaNhlanzi kodwa njengomholi wezinga lakhe, sibona ukuthi lolu daba ubengalungqumuza nabefundisi namakhosi akhonza ebandleni lakhe...