NGIXOLISA NGAMAPHUTHA EBHUKWINI
Iphephandaba langoLwesine (25 uNhlaba wezi-2017) belinodaba olunesihloko sithi: “Maningi amaphutha encwadini aNzimande”. Bebesho ibhuku lami elinesihloko sithi, “Amaqhawe neZikhulu zakwaZulu” eliphume gonyaka odlule. Ngiyafisa ukuziphendulela ulolu daba. Mangisho zisuka nje ukuthi giyaxolisa ngamaphutha enzeke ebhukwini ami futhi ngakusho lokhu nakusona isingeniso ebhuku leli,lapho engaphawula khona ngathi: Ngakho kufanele sikuthathe njengesiqalo lokhu sengikuqoqile. "Bayohlunga balungise amaphutha, babuye engeze abaziyo ngamanye amaqhawe nezikhulu oMbuso waKwaZulu”. Ngiyaphinda ngiyagcizelela uthi ukuthi ngiyazi njengombhali ongazithwele ukuthi amaphutha ayenzeka. Nalapha bengazi ukuthi azobe ekhona, noma ngingathi ngicophelele kangakanani, ikakhulukazi ngoba futhi nakhu ibhuku libhalwe ngesiZulu.
Kuba wumshikashika ukubhala ngolimi lwesintu kwikhompyutha engasiqondi isintu. Ngakho kungenzeka ukuthi lixhoshwe libhekile lapha ngibhala igama likaKlwana kaKhoboyela, ikhompyutha yagcina iliguqulile kwaba ngu’Klwana kaNqengelele’. Yobe lapho Nyambose. UNyambose ubuye akhale nangokuthi ngifake izangoma nezinyanga ezazivele zikhona embusweni wangaphambilini. Yebo, kufanele ngingabandlululi. Inhloso lapha wukubhala wonke amaqhawe nezikhulu ngaphandle kokushiya ngaphandle abanye.
Uma uNyambose ebala amaphutha ebhukwini, uphawula nangephutha lokulamanisa amabutho uthi uMdlenevu ngathi ebhukwini lami wazalwa ngowe-1883.
Sekuyaphambana nombhalo wami lokhu okuphawulwa nguNyambose. Kuleli bhuku lami “Amaqhawe neZikhulu zakwaZulu”, kakukho lokhu akubalayo ukuthi uMdlenevu ngowe-1883. Yiphutha nje eselenziwa nguyena uNyambose lelo. Ibhuku lami libeka ibutho uMdlenevu ngokuthi lazalwa ngowe-1823.
Kubaluleke kakhulu lokhu okweminyaka yokuzalwa kwamabutho. Ukuthi kwaqanjwa ngabakufika, kakusho ukuthi sasingeke sakusebenzisa thina abendabuko. Mina nje, kungisize kakhulu ekulandeliseni amabutho ngokuzalwa kwawo kuthi noma engimbuzayo enza iphutha ngokwelamana kozalo, ngimqondise, naye abuye avume ukuthi ubesenze iphutha. Mangigcizelele ukuthi iminyaka lena iyinkomba yokuzalwa kwamabutho njengokuthi nje uFasimba lunikezwe unyaka walo wokuzalwa waba phakathi kowe-1785-1798.
ILembe lase likhulile liyinsizwa libutha la mabutho, seliyiNgonyama. Ngayeka ngabomu ukubhala iminyaka okuthiwa abuthwa ngawo amabutho, ngibalekela khona lokhu kudideka kwabafundi okungahle kudaleke.
UKhukhulela kaMmiso kuliqiniso ukuthi wayeyinceku yoMntwana uMkabayi ngokusho kukasomlando uSivivi kaMaqungo kaThulisa wakwaMalunga wasesizweni samaHlubi, (ikhasi-374, James Stuart Archive, volume 5, amakhasi 367-383).
Lokhu kwakuvamile ukuba kube namakhosi ayizinceku zasendlunkulu ngoba phela oVelezwini nje babe yiso leNgonyama. Yisikhundla esihlonishwayo KwaZulu ukuba yinceku.
UNyambose uthi, “Maningi amaphutha impela encwadini kaMphephethwa”. Angaba khona amanye amaphutha, kepha ngingeke ngize ngithi maningi kangako.
Uma mhlawumbe emaningi amaphutha atholakalayo, ngiyocela bangishayele ucingo abanothando lwalo msebenzi noma abanokunye okubalulekile abafisa ukukwethula. Themba Nzimande, ULUNDI