ZIYANDA IZINHLELO ENGAQONDAKALI INHLOSO YAZO
KULELI sonto ngike ngabona kusuka uthuthuva ezinkundleni zokuxhumana ngesikhathi omunye wozakwethu ephawula ngohlelo oluzokhombisa ngempilo yalabo baba abazibiza ngamablesser. Kulolu hlelo kuzophinde kukhonjiswe nalabo ababizwa ngama- blessee.
Lolu hlelo lulindeleke ukuba luhambe phambili njengezinye ezifuze lona.
Izinhlelo-ke ezingaqondakali ukuthi yini inhloso yazo futhi zinika siphi isifundo ziyanda mihla namalanga futhi zivele zibe nedumela okwedlula lezo eziqukethe lukhulu olungazuzisa umphakathi ngolwazi.
Kuthe kungakapheli ngisho umzuzu lo zakwethu ekufakile lokhu ezinkundleni zokuxhumana zabe seziqalile ukumtinyela izinyosi, zimgxeka ngokuthi lolu hlelo luwumbhedo, ngeke lube nasifundo esihle emphakathini.
Omunye uze waphawula wathi ngubani ozobe ephoqe abantu ukuba balubuke, wathi abazolubuka bazokwenza lokho ngoba kusuka enhliziyweni yabo. Yize ngivumelana nesitatimende sokuthi sifuqwa ngobulongwe bodwa kwezinye izinhlelo zikamabonakude kodwa kumele nathi sibuye sishintshe, sizibukele izinhlelo ezinomqondo njengalezo zokupheka mhlawumbe.
Phela masikhumbule bakithi ukuthi kukhona uSABC 1, 2 no 3 kuphinde kube khona u-Etv nawo osunohla lwezinhlelo njengoba une-Open View HD, bese kuba khona iDSTV. Lapha kwaDSTV kukhona cishe izinhlelo ezingaphezulu kwezingamashumi amabili. Zonke lezi nhlelo zinezigaba ezahlukene futhi zonke lezi nhlelo zikutshengisa okuningi okufundisayo kuphinde kuhlekise kanti okunye kukushiya uzibuza imibuzo kodwa uphinde ubone ukuthi phela bayasho ukuthi ziyiFiction, okusho ukuthi kakusiyona into yangempela.
Kukhona ishaneli okuthiwa yiTLC lapho bekhombisa khona ngezifo ezahlukene nokuthi ungaphila kanjani nazo noma ungaluthola kanjani usizo uma unezinto ocabanga ukuthi zihlupha wena wedwa.
Mangithathe nje i-Excess Skin, lapho kukhonjiswa khona ngabantu okungekhona ukuthi bakhuluphele ngokweqile kodwa yingenxa yamafutha alokhu ekhula ngaphakathi futhi angabanga inkinga.
Kule shaneli kuphinde kufundiswe ngokuzithanda. Kukhona uhlelo olubizwa ngeMy Big Fat Fabulous Life olukhuthaza ukuzithanda kubantu abanomzimba omkhulu. Ngaphezulu kwalokhu kukhona amashaneli okupheka lapho kukhonjiswa khona ngezinto ezisobala, ezinye ohlale uzibuza ukuthi zenzani ekudleni.
Ngakho kungakuhle ukuba kulobu busika sike si- explore noma sijule kabanzi ngezinye izinhlelo ezikhonjiswa kumabonakude ezingabhekwa ngabantwana bethu, kube khona abakufundayo kuzo hhayi babuke wonke lo msangano okhonjiswayo.
Yize ngingakazi ukuthi iyiphi ishaneli ezokhombisa lolu hlelo kodwa singabheja imali ihlale ngakuwe, kuphakathi koMzansi Magic noma uSABC. Phela lawa mashaneli amabili ungathi athakathwa ngokwethula izinhlelo ezikushiya uzibuza ukuthi ngabe bebedakwe ngobamaganu yini bevuma izinhlelo ezifana nalezi esizibonayo.
Masethembe ukuthi abadidiyeli bohlelo lwama-blesser bayawuqonda umonakalo abangase bawenze entsheni yaseNingizimu Africa njengoba sivele silwa nesihlava sokubulawa kwabesifazane nezingane zamantombazane iningi lawo elibulawa ngamasoka.