Bazolusukumela olokucwaswa
Owezemfundo ugxeka abazali ngalokhu
UFUNGA uyagomela uMnyango wezeMfundo KwaZulu-Natal uthi uzobhekana ngqo nezigameko zokucwaswa kwabafundi ngokwebala ezikoleni zakulesi sifundazwe.
Kuzokhumbuleka ukuthi kusuke isidumo emasontweni amabili edlule umfundi wasePietermaritzburg Girls High School ebiza ozakwabo ngamakhafula, ebasola ngokungakwazi ukupela igama lakhe.
Umnyango uthi usuzwile ukuthi kunothisha abayinyathelayo eyokuhlukumezeka kwabanye abafundi yize bebikelwa.
Okhulumela uMnyango wezeMfundo KwaZulu-Natal, uMnu Kwazi Mthethwa, uthi bagxeka kakhulu abazali ngalokhu ngoba ezinye izingane zisuka nemfundiso efana nalena emakhaya.
Utshele leli phephandaba ukuthi inkinga yokuhlukunyezwa ivame ukubhekana nabafundi abampisholo.
“Kasithokozile ngesenzo so- thisha abafukamela izingane ezicwasa ezinye ngokobuhlanga. Le nto kasiyifuni ezikoleni ngoba ilimaza ingqondo yabanye abantwana yingakho sinxusa abazali ukuba basebenzisane nathi ikhuzwe le nto ngoba kuzothathwa izinyathelo ezingezinhle ngomfundi ozotholakala ecwasa abanye.
“Sesitholile nokuthi ukucwaswa kwabafundi kwandile kakhulu ezikoleni ezingamaModel C,” kusho uMnu Mthethwa.
Uveze nokuthi bamatasa nezinhlelo zokuba abafundi bakwazi ukuzixhumanela ngqo noNgqongqoshe wezeMfundo, uMnu Mthandeni Dlungwane, uma becwaswa.
“Kuyasethusa ukuthi kusenabantwana abakhuluma kabi kwabanye ekubeni umthetho ungakuvumi lokho. Sizokwenza amaworkshop othisha lapho sizobatshela khona ukuthi mabayigcizelele le nto, ikakhulukazi kwiLife Orientation egxile ekuziphatheni komfundi nendlela yokuphila nabantu,” kusho uMnu Mthethwa.
ISekela-mengameli leNational Teachers' Union (Natu), uMnu Allen Thompson, lithe bayalugxeka ubandlululo ezikoleni, lathi nabazali - bezingane ezicwasa ezinye - kumele baqiniselwe umthetho.
“Siyawunxusa uhulumeni ukuba uthuthukise izikole zasemakhaya nezasemalokshini, kufakwe amakhompyutha, imitapo yolwazi namalabhorathori ngoba izingane zabantu abamnyama zifudukela kwezabamhlophe ngenxa yokushoda kwengqalazizinda.
“Lokhu okwenzekayo sekucacisile ukuthi kunohlelo olwenziwayo yilezi zikole lokuhlukumeza abanye abantwana ngoba bengafunwa kwezabamhlophe,” kusho uMnu Thompson.
UNobhala weSouth African Democratic Teachers' Union (Sadtu) KwaZulu-Natal, uNkz Nomarashiya Caluza, uthe kubalulekile abantwana bakuqonde ukuthi lesi sizwe sisukaphi.
“Kasihambisani nothisha abafihla into embi kanjena. Umnyango mawungenelele impela‚" kusho uNkz Caluza.