UCELA USIZO UMFUNDI OYOMELA ININGIZIMU AFRIKA EGREECE
UJABULELA ukuyomela iNingizimu Afrika e-Athens, eGreece umfundi waseBrettonwood High School, eMbilo, eThekwini ohlabane ngethuba eliyingqayi-zivele lokuyoqhakambisa leli lizwe phesheya kwezilwandle.
UVukile Tembe (16) ofunda uGrade 11 kulesi sikole, uzofulathela leli mhla zili-16 kuNtulikazi (July) njengoba enqobe emncintiswaneni obizwa ngeWorld Scholars‚ Cup obekuhloswe ngawo ukucija abafundi kwezokucobelelana ngolwazi, okubalwa ukubhalwa kwezindaba ezinde ( essay).
Bebebhala ngokulandela izihloko ezithile abanikezwe zona ezithinta ipolitiki, umnotho, ezenkolo nokunye. bebenza nezinkulumompikiswano nokuphendula imibuzo benikezwe nezimpendulo abakhetha kuzona.
UVukile uthi ungenele lo mncintiswano obuseMgungundlovu, maphakathi neKwaZulu-Natal ngoNhlolanja (February) nonyaka engazitsheli ukuthi uzokuba ngomunye wabafundi bezikole ezili-11 ezikwazile ukudlulela esigabeni esilandelayo.
Uthi usekulungele ukuyogadla ngazo zonke ukuze aphakamise iNi-ngizimu Afrika njengoba kulo mncintiswano kuzobe sekuhlangene abafundi abavela emazweni angama-50 kanti abazonqoba bazodlulela esigabeni sokugcina lapho umncintiswano uzokuba seYale University Newhaven, eConnecticut, e-United State of America (USA).
Abayisihlanu abazophuma phambili eYale bazonikezwa umfundaze wokwenza iziqu zabo kuyona le nyuvesi.
“Ngingenele ngenhloso yokuzikhulisa emqondweni nokuzijwayeza ukukhuluma phambi kwaba- ntu emphakathini nokukhulisa izinga lokucabanga kwazise besinikezwa isikhashana ukuba sicabange ngesihloko esithile, senze nocwaningo ngokukhulu ukushesha bese siqhudelana.
“Namanje ngisenethemba lokuthi izwe lethu lizowaqwaqwada onke lawa esizobe sibhekene nawo. Okubi kakhulu wukuthi ngiswele imali yokuhamba ngoba ekhaya kabanawo amandla, isimo kasivumi kahle kanti ngizimisele ngokufeza iphupho lami,” kusho uVukile.
Lo mfundi unxusa umSamariya olungileyo ongakwazi ukumxhasa ngemali engaphezulu kuka-R20 000 yezindleko. Uzohlala izinsuku eziyisi-7 eGreece.
“Ngicela umphakathi unginikelele noma ngabe okungakanani onakho,” kusho lo mfundi.
Kulo mncintiswano kuqhudelana izikole zesifundazwe bese abafundi abanqobile bavakashele amanye amazwe beyocobelelana ngolwazi, banikezane nemibono ehlukene ngezihloko abazosebenza ngaphansi kwazo ukuze kuvuleleke ukucabanga kwabo.
Abanesifiso sokuxhasa lo mfundi bayacelwa ukuba baxhumane nephephandaba ILANGA.
Okubi kakhulu wukuthi ngiswele imali yokuhamba ngoba ekhaya kabanawo...