Bashaywe ngesithende
Kufuneka abadlali abasha kwiMangosuthu Legacy Cup
ASHAYWE ngesithende amakhehla kwiPrince Mangosuthu Legacy Cup ezokuba ngempelasonto yokuphela kukaNtulikazi (July) Olundi Regional Stadium.
UJeremiah “Ace” Mdlalose onguMengameli weSouth African Football Association (Safa) Zululand, uthi banqume ukuqoka abadlali abaneminyaka engaphansi kwenga- 21 ubudala ukuba yingxenye yesikwati saseZululand esizobamba iqhaza kulo mqhudelwano.
“Lo mqhudelwano ufike kahle sinohlelo esiphezu kwalo lokuthuthukisa ibhola.
"Sesikhathele ukulokhu sithi siyathuthukisa ekubeni sisebenza ngabadlali abadala.
"Ukuvelela kukaPhakamani Mahlambi weBidvest Wits kusinika ithemba ngokusimama kwebhola kule ndawo.
“Sike sakhipha uJabulani Ndwandwe wadlala amasizini ambalwa kwiPremiership ngenxa yokuthi ubevele iminyaka yobudala isihambile.
"Ngakho-ke sesiqoke ukusebenza ngabadlali abasebancane ukuze bakwazi ukuhlala isikhathi eside esigabeni esikhulu,” kusho uMdlalose osehole iSafa kule ndawo isikhathi eside njengoba ebenguMengameli weSafa Eastern KwaZulu-Natal ngaphambi kokuba iSafa imiswe ngokwemingcele yomasipala.
Uthi bazobamba umhlangano wokudweba kabusha umthethosisekelo wesifunda ukuze uha- mbisane nokazwelonke.
Ngemuva kwalokhu uthi kuzokube sekukhethwa ubuholi bamaLocal Football Association okuzolanywa wukhetho lobuholi besifunda.
UMdlalose uthi kuzokuba kubaholi bamaLFA ukuthi bamjuba kuphi. Nokho ukugcizelele ukuthi sekumele kungene igazi elisha njengoba esehole isifunda isikhathi eside.
Kulo mqhudelwano okuhlonishwa ngawo amagalelo eNkosi Mangosuthu Buthelezi enguMholi weNkatha Freedom Party, kuzodlala uSuthu, iBloemfontein Celtic, iMbabane Swallows yaseSwaziland nesikwati sika-U/21 saseZululand.