INDIDA KUTHOLAKALA IBHOKISI NESIQANDISI EMFULENI
KUQUBULE ingebhe emphakathini waseMkhazini, eMakgonofaneng, eNquthu, enyakatho yeKwaZulu-Natal kutholakala ibhokisi lomngcwabo nezinye izinto ezethusayo eduze komfula iHlathi ngoMgqibelo - kusolakala ubuthakathi.
ILANGA lithole ngomthombo walo ukuthi kunamalunga omphakathi abezihambela nje eduze nalo mfula kanti azozithela phezu kwaleli bhokisi nezinye izinto ezingaqondakali okukhona namathambo okungaqondakali noma ngawabantu yini.
Amanye abeshisiwe njengoba bekuneziko eduze kwawo - amabhayi ezangoma, uphondo olude obelugoqwe ngebhayi, ipuleti nohlweza lwemali engo-R2 no-R5 ebiningi ngendlela yokuthi bekungelula ukuyibala.
Bekukhona ngisho izinqe zamaselwa ebezifakwe esakeni nesiqandisi. ILANGA liyile kuleya ndawo ngalo uLwesibili, lazibonela le mihlola ekhalisa umphakathi.
Lixoxe nengxenye yamalunga omphakathi eveze izindaba ezishaqisayo ngalo mfula ohamba njalo uze uyofinyelela eMzinyathi. Izingwevu zendawo zithi lo mfula ubudume ngokuba yikhaya lotikoloshe abangaziwa ukuthi bangabakabani.
“Sisakhula besiyaye sitshelwe ukuthi kakufanele sihambe ngakulo mfula ngoba unabantu abafushane futhi abanezintshebe nezimpandla. Okwenzeke ngoMgqibelo kuyasethusa ngoba kakukapheli sikhathi esingakanani kuvaleke omunye umama amehlo ngemuva kokuba ebone inyoka (inhlwathi) iphumele ngaphandle komfula, kwaqondana amehlo ayo nawakhe.
"Lokhu okwenzeke kuleli sonto sikuthatha njengobuthakathi,” kusho elinye ilunga lomphakathi.
UMnu Jeremiah Goge (61) -oyilunga lomphakathi - uthe kuningi okuyaye kwenziwe kulo mfula. “Kunabantu abageza abanye amashwa kulo mfula. Kusishiya nombuzo ongaphenduleki ukutholakala kwebhokisi lomngcwabo neziko nemithi. Akadabulanga lo muntu obethakathwa.
"Sididwa nawukuthi besiyaphi isiqandisi ngoba kazikho izindlu laphaya. Okushayisa ngovalo kakhulu wukuthi lo mfula uphakathi kwemizi yethu. Sivele sihleli ngesinqe esisodwa ngenxa yale nyoka okuke kubikwe ukuthi ibuye iphenduke ibe yisilwane esijwayelekile uma ifuna ukuphumela ngaphandle iyozifunela ukudla. Udaba lokuthi kunotikoloshe kulo mfula, ludala kakhulu.
"Le nyanga okanye umthakathi olahle lezi zinto ngakulo mfula, ufanelwe ukugwetshwa axoshwe nasendaweni ngoba kasikaze sizwe kuthiwa kwelashwa umuntu ngale ndlela,” kusho uMnu Goge.
INkosi yakule ndawo, uBokang Molefe, isigxekile lesi senzo. Ikubeke yangahloniza ukuthi wubuthakathi lobu. Ithe izohlanganisa umphakathi nezinye izinhlaka ezahlukene ludingidwe udaba lwalesi sigameko ngoba luvusa itwetwe emphakathini owakhele lo mfula.
“Siphila esikhathini lapho abantu sebenamalungelo kodwa akekho onelungelo lokugila imikhuba ehlukumeza umphakathi. Ngiyanxusa ukuba kubuye unembeza kubantu, bazi ukuthi ibhokisi lomngcwabo yinto ehloniphekile hhayi yokugila imikhuba emibi. Kakukhona ukwelapha lokhu kodwa wubuthakathi,” kusho inkosi.