Lingene ehlazweni ikhansela 'elingondli'
Lngane iphila nokukhubazeka
LINGENE ehlazweni ikhansela le-African National Congress kuwadi 7 ngaphansi kukaMasipala iDkt Nkosazane DlaminiZuma elisolwa engokungondli.
UMnu Samson “Dum Dum” Dlamini waseGqumeni, eBulwer maphakathi neKwaZulu-Natal, kuvela ukuthi akayondli ingane ephila nokukhubazeka okuthiwa uyizala kuNkz Samke Sosibo (32).
UNkz Sosibo uthi le ngane uyithole ngowezi-2005, uyise nguMnu Dlamini obelokhu eyondla kusukela izalwa kwaze kwaba wunyaka wezi-2008. Uthi ngawo lowo nyaka uhlukanile noMnu Dlamini emuva kokungaboni ngasolinye.
Utshele ILANGA ukuthi selokhu behlukene, uMnu Dlamini akaphindanga wayondla ingane okumanje isineminyaka eli-12 ubudala. “Uma ngimtshela ngezidingo zengane, uvele athi uzwile kodwa angenzi lutho emuva kwalokho. Kulokhu kokugcina kade ngigcina ukukhuluma naye ngoMbasa (April), ngimtshelile ukuthi ingane iyagula iwile yaquleka, kakuzange kumethuse lokho njengoba engakaze eze ezoyibona kuze kube yimanje.
"Uma ngimtshela ukuthi ngizombopha ngokungayondli ingane yakhe, uvele athi ngizohluleka baningi onina bezingane bezama ukumbopha behluleke,” kusho uNkz Sosibo.
Uthi ingane yakhe njengoba ifunda esikoleni sabanezidingo ezehlukile, idinga imali ethe xaxa njengoba kukhokhwa kulezi zikole. Nebhasi elithatha abafundi beya kulesi sikole uthi liyakhokhelwa. “Wonke lo mthwalo usemahlombe ami njengoba uyise wengane engayingeni eyokondla kanti mina kangisebenzi into esile, ngibamba amatohho,” kusho yena.
Ethintwa ngalolu daba uMnu Dlamini, uthe impela sekunesikhathi engayondli ingane kodwa kungamanga ukuthi ugcine ngowezi-2008. “Kukhona izingqinamba ezikhona phakathi kwethu, kangifuni ukukhuluma ngazo ngingakuboni. Ngicela sibe nomhlangano sikhulume ngalolu daba,” kusho uMnu Dlamini.
Uthe kungcono uNkz Sosibo amyise enkantolo. "Inkantolo ingcono kunawe ngoba izonginika ithuba lokubeka nami okwami ngoba wena sengathi kawufuni ukuzwa uhlangothi lwami.
"Angithi nawe uyazi kuyenzeka nasemshadweni umuntu ondle ingane okungesiyona eyakhe?" kusho uMnu Dlamini ebhekise kuleli phephandaba. Ebuzwa ukuthi ngabe uqonde ukuthi ingane kakusiyona yini eyakhe, uthe akasho kanjalo.
Ebuzwa ngohlangothi abethi ufuna ukuluveza, ugcine engaphumelanga obala. Uthathe izinombolo zaleli phephandaba wacela ukuhlangana nalo ukuze kukhulunywe ngalolu daba nonina wengane abe khona.