YENZA UHLELOHLAKA OLUNCIKE ENGC
K U NABAFUNDI bengosi asebe phindaphinde izikhathi ezimbalwa becela siphinde lesi siqephu esimayelana nokuhlomela izinkinga ezidalwa yisimo sezulu esingaqondakali.
Angithi phela kakuselula ukubhula isimo sezulu njengakuqala. Sesihlangabezana nobunzima bempilo obudalwa yisimo sezulu e sishintshashintshayo, kodwa kulula ukubona ukuthi umlimi wechabuthi naye uyakwazi ukuphosa itshe esivivaneni ekugwemeni lesi simo.
Umhlabathi onekhabhoni eyenele umunca umswakama owenele ngezikhathi zikazamcolo bese lo mswakama usebenziseka ngezikhathi zesomiso.
Ukulima ngechabuthi kubuyisela ikhabhoni emhlabathini ngoba umhlabathi uhlale ugubezelwe ngezitshalo, amabibi nezibola kanti namadlelo ahlelekile ayayixazulula le nkinga.
Umhlabathi ungunozala endalweni jikelele, kubantu, ezilwaneni nasezimileni.
Umlimi wechabuthi kulindeleke ukuba awunakekele ungacekeleki phansi ngokuguguleka.
Ukuguguleka kusho ukunyakaziseka komhlabathi okubangwa ngamaconsi emvula noma umoya onesivinini.
Izimpawu zokuqala sibona umhlabathi uhlukana izinhlayiya okuvame ukuba zivele ziyimibala ehlukene. Lokhu kungaqala ngokuhlukana sengathi yishidi elikhulu, lapho kuxebuka kanye kanye.
Kwesinye isikhathi kuye ngokwanda kube sengathi yiminkenke emhlabathini, kuze kugcine sekuvele amagebe amakhulu emisele agcina eseyizindonga ezinkulu.
Kwesinye isikhathi sivele sibone nje izimpande zezimila, okuwolunye uphawu lokuguguleka komhlabathi. Lokhu kungadalwa wukuklabisa imfuyo ngendlela engahlelekile.
Wukulima nokutshala ngendlela engahlelekile, wukulima ezindaweni ezisengcupheni yokuguguleka, wukucekela phansi amahlathi namahlokozi ngenxa yesidingo sezinkuni.