#TBT: LERATO KGANYAGO
MAYELANA nokubuyisana phakathi kukaKhuzani “iNdlamlenze” Mpungose noMthandeni “iGcokama Elisha” Manqele, nansi imibono yabafundi. AWAKUWHATSAPP:
NGIBONGELA lezi zinsizwa ezithathe isinqumo esihle. Ngibonga angiqedi, nabanye mababonele kuzona. Kuhle kuyabongeka, inhlamba mayiphele kushaywe ingoma. Bonele Duma, EMIDDELBURG (umlandeli wala madoda amabili)
NGIWUTHANDA kakhulu umculo kamaskandi. Ngincoma iNdlamlenze neGcokama, kuhle kakhulu abakwenzile ngoba kuzonqanda ukubulalana kwabantu. Mazibulalane ngengoma hhayi ngenhlamba nodlame. Lezi sinsizwa zidide abaningi ngalesi senzo. Makhothwa Dibhalezinja Ngobese
KUNGTHOKOZISILE futhi kukhombisa ukukhula okwenzeke phakathi kukaMthandeni noKhuzani. Kade ngifisa kwenzeke ngoba sigcina singasawuzwa umsoco wezingoma silibele wukuthi umculi othile kawumlaleli ngenxa yokuthi akezwani nomunye. Sindi Ntuli, ENEMBE
UMA insizwa iliciko ikwazi ukucikoza, yini edala ukuba omunye asho into enohlevane komunye ngoba ukubhala ingoma kulula njengokuthi nje: “Mina ngiyinsizwa bafana bakithi, ngakhula ngenhlonipho futhi ngiyazithanda. Engakhula nabo bayangazi.” Kuphi ukuphoxa la? Nathi, EMELMOTH
KUHLE okwenziwe yilezi zinsizwa ngoba kasisabazi abanye abaculi ngenxa yokuthi kugqame zona zombili ngezigigaba ezingezinhle. Ngisho ungeyena umlandeli kamasikandi kodwa uyazi ukuthi kukhona iGcokama Elisha noKhuzani abalwayo.
Manzini Zungu, KWAMAPHUMULO
NGIYETHEMBA sizophathana kahle ngoJulayi 24, ngeke silwe sodwa ngoba thina balandeli bakamasikandi sesidume kabi. Phansi ngengxabano. Tutshe Sibiya KwaCeza EDLABANE (Umlandeli kaKhuzani)
YINTO enhle kakhulu eyenziwe yiGcokama Elisha neNdlamlenze ngoba kuzokwenza thina singabalandeli sibone ukuthi kayikho impi phakathi kwabo. Simphiwe Mchunu, EDANNHAUSER
BENZE umsebenzi omuhle abaculi banqanda ulaka ngoba bese kukubi uma sekuphuma imiphefumulo. Inkinga ngabalandeli, kangazi kungenziwa njani ngoba bayiphemba ezinkundleni zokuxhumana ingxabano.
Bayathukana kube njeya. Kulaba bafana abaculayo sicela babe yisibonelo esihle kwabasakhula, mayiphele le nto igcine ngabo bobabili oKhuzani noMthandeni.
Bayathandwa laba bantu, ukuba kuya ngami bebezokhipha ingoma becula bobabili, nasemicimbini babonakale behamba bobabili, mhlawumbe lokho kungawenza umehluko. Umlandeli kamasikandi
NGIYITHANDILE indlela lezi zinsizwa ezenze ngayo zikhumelana umlotha, lokhu kubonisa ukukhula nokunakekela abalandeli babo okuyithina esithanda umculo wesintu. Kepha yithina esiqhatha abaculi ezinkundleni zokuxhumana. Ngicela lawa maciko eluleke nabalandeli babo nabalandeli bakamasikandi bonkana ukuthi mabase-
benzise izinkundla zokuxhumana ngendlela eyiyona, sikhulise umculo wethu ngendlela eyakhayo neyisifundo ezizukulwaneni nezizukulwane ezizayo. Okunye ngingaku-jabulela ukubabona bepikene kuma album abo angoZibandlela ukuze le nto izophela nya. Mlungisi Mfanomdala Gcaba, ENQUTHU
UKUBUYISANA kukaKhuzani noMthandeni yisenzo esihle kakhulu leso esikhombisa okukhulu ukukhula. Sphakeme Zondi, KWAGEZUBUSO
KUYANCOMEKA okwenziwe ngomasikandi ababili ngokwezinga abakulona ngokomculo. Akufanele neze babe nga-mahlongandlebe ngoba sibathatha njengesibuko somasikandi, nabanye abasafisa ukungena emculweni babukela kubona. Sandile Mvelase, Olundi ENHLUNGWANE
IMPELA kuhle lokhu abakwenzile ngokuthelelana amanzi, sekusele ukuba babize bonke abalandeli babo babakhuze. Bonisiwe Mbonambi, OLUNDI
AWAKUFACEBOOK:
ABALANDELI yibona abayimpethu kulokhu. Kumanje abaculi abebengezwani sebekhumelene umlotha bavumelana ngokuthi mayiphele kodwa abalandeli bona basaklwebhana ezinkundleni zokuxhumana. Kanti nifunani ngempela we balandeli? Agricolla Xolani TedyBae Mabaso
NGINETHEMBA lokuthi lawa maciko, uKhuzani noMthandeni, njengoba sebexolelene,
kabaqhutshwanga muntu, baziyele bona kungqongqoshe, hhayi le mfeketho umdanso wezigwili eyake yenzeka ngokwedlule.
Sengathi nabalandeli bala maciko bangalufunda futhi baluqondisise lolu xolo lwala maciko bese belwamukela ngoba yibona (abalandeli) ababuye babhebhethekise izinkulumo ezingakhi, ikakhulukazi ezinkundleni zokuxhumana. Phumlani Muthwenyongo Langa
BABEVELE nje bengaxabene. Kunje-nje kungenxa yethu thina balandeli esibaqhathayo. Mxolisi Zulu
SIBONGA kakhulu uma sebethathe isinqumo sokuzehlisa, baxolelane. Mabashaye ingoma-ke bathokozise abalandeli. Malibongwe Mzilankatha
WEHLULEKA uBhodloza kwiNdidane neBhova. Uze ungibuze, kuyothi kushaya uZibandlela (December) liyobe seligaya ngomunye umhlathi. Sabelo Sabs Cele
KASISAKHOLWA lutho ngoba uMtshengiseni noMgqumeni kwashiwo kanjena, kwathiwa iphelile, bahlanganiswa. Yake yaphela na? KuThokozani Langa noMtshengiseni noAli Mgube yake yaphela yini? Khumbulani Mlambo
NALO leli phephandaba maliyeke ukuchema ngoba nawo amaphepha anomthelela ekuqhatheni abalandeli nabaculi. NoMthobisi Sithole ake ame kancane nje ezindabeni zabaculi, abhale kuphela. Isiyodibana ngomhlaka-22 July 2017 kwiWorld Cup yoMasikandi eMoses Mabhida Stadium, eThekwini. Bhekisisa Vincent Mbatha
THINA singabalandeli masiyeke ukuxova. Siyababona bahlangene futhi nodaba lwabo selu-xazululekile kepha sekuyithi umoya wobutha. Noma ngabe bayakhohlisana kepha ngoba bathi babuyisene okwamanje masibeseke sibakhe. Sphiwe Khuleh
OMGQUMENI noMtshengiseni baze bacula emsakazweni bethi baxolelene kodwa kwaqhubeka, nakulaba kusazoba njalo. Zweli Mbatha
ILANGA likhombise okukhulu ukukhula kule ndaba. Masethembe ukuthi awabambelene magqubu lawa madoda, nezingoma ezigadlayo azozihoxisa bese le engeyesithathu, uMthobisi, ibhale okuyikhona emaphephanda-beni. Abalandeli bakaMthandeni mabacishe lezi zithombe ezihlambalaza uMthobisi, nami sengizisusile nje. Mcoseleli Imange Mabaso Mange
MABACULE ndawonye njengoba kwakusho uKhulubuse Zuma yikhona sizobona ukuthi iphelile ngempela, ngeke besathukana. Uma nithi sebexolelene, bebeke babangani ngoba vele babengaxabene, bebethukana nje.
UMjikijelwa bebemthuka oJaiva naBafana bakaMgqumeni kodwa namhlanje bacula bonke ndawonye ngoba vele babengabangi lutho. Delani Mxolisi Khoza
KUHLE abakwenzile kepha singakhohlwa wukuthi basebhizinisini. Uma bebethengwa kakhulu ngenkathi bedelelana, basazoqhubeka nokudelelana. Thina balandeli masiyeke ukuxabanela into engekho, masithenge umculo nje kuphela sizwe ingoma. Andile Innocent