IDILI LOMCULO KUVULWA USHISANYAMA EMHLANGA
USHISANYAMA osendaweni yabadla izambane likapondo uzovulwa ngendumezululu okuzobe kuboshelwe kuyo abaculi abanohlonze.
Phakathi kwabaculi abazobe beboshelwe kulo mcimbi wokuvula lo shisanyama obizwa ngokuthi yiUnique Lifestle Cafe, eseMhlanga Rocks kubalwa uRicky Rick, uKhuzani Mpu-ngose, uDJ Siyanda, uFelix Hlo-phe, uDJ Bruce, uJnr Da Rocker nabanye.
Lo mcimbi uzobe ungeSonto lona leli lakusasa, elihambisana nempelasonto ematasatasa eThekwini yeVodacom Durban July (VDJ). Nakuba oshisanyama kuyinto eyejwayeleke emalokishini kodwa sekubonakala banda nasezindaweni zomtakabani.
Omunye wabanikazi bale ndawo uthi babone isidingo sawo kule ndawo, yingakho bewuvula.
“Yize noma zikhona izindawo zoshisanyama ezisemalokishini kodwa nathi sithe asiyivule la esilungwini ngoba kunabantu abaningi abasuka lana baye emalokishini beyofuna ushisanya- ma,” kuchaza uCalvin Mathibedi ongomunye wabanikazi bale ndawo.
Njengoba edolobheni eThekwini imicimbi yobu-mnandi izobe ithe chithi saka, nabantu abangaphandle kwedolobha ngeke basale ngaphandle. Kuhlelwe iLoxion Shut Down ezobe iseAdams Sport Ground, eLovu. Khona kuzobe kunandisa uKhetha Gwala, uS Villa, Mawat nabanye abaningi. Lo mcimbi uhlelwe yiBoss Lady Production ephethwe nguZama Mkhize owaziwa ngeMirrow PR noCindy Ndlovu waseMlazi. UDJ Kotin naye uhlele umcimbi wenjabulo KwaMashu e-Artizen. Khona kuzobe kunandisa uProfessor, uSjava, uMondli Ngcobo nabanye abaningi.