Ungaba sesitayeleni noma ukhulelwe
KAYIKHO into ethandeka njengokubona owesifazane okhulelwe egqoke kahle. Phela kuyinto eyaziwayo ukuthi kakulula ukugqoka noma yini oyithandayo uma ukhulelwe.
Mhlawumbe yingakho iningi lize libonakale lizilengela uma likhulelwe noma livele libalekele ekugqokeni ama- tshirt. Owesifazane ogqoke kahle uyakhanga futhi uyathandeka, kumenza abonakale njengomuntu ozinakekelayo.
Kodwa-ke kumele sikhumbule ukuthi kakulula neze ukugqokela isisu kwazise kunzima ngisho ungakhulelwe. Kunesikhathi la oke ulale khona u-ayinile into ozoyigqoka kodwa ekuseni uthole ukuthi sewufuna ukugqoka okunye.
Angisaphathi-ke mawungumama ozithwele, uke uzilungiselele uthi uzogqoka okuthile kodwa kuyothi uma usugqoka uthole ukuthi sekuyakumpintsha ngenxa yesisu. Esikhundleni sokuba ujabulele umtwana wakho osuke umkhulelwe ugcina usucikwa wukuthi kawuzitholi izinto ezikufanelayo zokugqoka. Kudala bekuyaye kube nengcindezi yokuthi owesifazane okhulelwe kakumele agqoke ngendlela ethile. Isibonelo nje uma ugqoke into ekubamba thaqa bekuba sengathi wenza okungenziwa ngoba bekuthiwa isisu siyahlonishwa. Mhlawumbe lesi ngesinye sezizathu ezenza abanye bangakujabuleli ukugqokela kahle izisu zabo. Esikhathini esiningi uma ukhulelwe bekwaziwa ukuthi uzobonakala ngokugqoka imaternity dress. Nokho kuhambe isikhathi abanye besifazane bakhathala wukugqoka ngale ndlela njengoba abanye besebebonakala begqoka ama- crop top nama- vest ngenhloso yokukhombisa injabulo yesiteji abasuke bekuso noma bengena kuso sokuba ngumama. U-Enhle Mlotshwa uze wasungula imfashini yabesifazane abakhulelwe ngoba ethi ngesikhathi ekhulelwe umntwana wokuqala wakuthola kunzima ukugqoka ngendlela emchazayo. Le ntokazi ingenye yabesifazane okubukelwa kuyo uma kuza kwezemfashini kwazise kayijwayele ukushaya eceleni. Ngokusungula ilebuli yayo ebizwa ngePreggoz baningi ababonakale sebegqoka ngendlela esemfashinini.
UBeyonce ongumculi waphesheya kwezilwandle cishe ungomunye wabesifazane okwenza uzizwe ufisa ukukhulelwa ngendlela agqokela ngayo isisu sakhe. Ugqoka ngendlela e- trendy futhi ebukekayo.
Kasikho isidingo sokungabi muhle uma ukhulelwe nesokuba ufihle isisu uma sikhula. Izimpahla zokugqoka ezifana nama- cardigan, ama- blazer, yiziketi ezinama elastic band njengama- maxi skirt namastrappy vest zikhululana kahle.
Thenga ama- legging. Agqokeka nanoma yini futhi ahlale esemfashinini. Ayagqokeka nezicathulo ezihambela phansi ( flat) noma ama- heel.
Sebenzisa ama- accesory. Amaaccessory akwazi ukushintsha impahla oyigqokile ibukeke kahle. Ngaphezu kwalokho ayinto ongakwazi ukuba uyigqoke ngisho usubelethile.
Ungesabi ukusebenzisa ibhande ukuze okugqokile kubukeke kusesitayeleni. Kuba kuhle uma uzogqoka ibhande nengubo kodwa kungabi elizokubamba nsi.
Usengakwazi ukugqoka ama- heel Gqoka ama- pencil heel noma amawedge.
Gwema amabhulukwe awosbhulamazolo. Lolu hlobo lwamabhu- lukwe luyakhululana kodwa angakwenza ubukeke umkhulu ngokwedlulele
Thenga amamaternity jean. Ayabiza kodwa azokwenza ubukeke usesitayeleni ngaso sonke isikhathi.