KUZOCACA NGOMGQIBELO NGESIKOLE ESIZOMELA ELAKULELI KWEYENDEBE YOMHLABA YE-DANONE U/12
KUZOSHONA ilanga langoMgqibelo sekucacile ngesikole esizomela iNingizimu Afrika emidlalweni yomhlaba ngaphansi kweDanone Nations U/12 Cup njengoba kunemidlalo kazwelonke eGoli.
Imidlalo yomhlaba izokuba ngoMandulo (September) e-United States of America (USA). IMophela Primary yaseHammarsdale yiyona emele iKwaZulu-Natal kule midlalo ngemuva kokudla ubhedu kweyesifundazwe ebiseClermont muva nje.
Lesi sikole kulindeleke ukuba sibuyise isithunzi sesifundazwe kule midlalo njengoba sekubalwa iminyaka iKwaZulu-Natal ingayi emidlalweni yomhlaba.
UThemba Tshabalala osehhovisi leSouth African Schools Football Association (Sasfa) kuzwelonke, uthe konke sekumi ngomumo. Izikole ziqhathwe izolo ngoLwesithathu ntambama.
“Zonke izikole zizofika eGoli ngoLwesihlanu (kusasa) bese abafundi behlonywa imibuzo ukuqinisekisa ukuthi abapikiwe futhi kayikokoteliwe iminyaka yabo yobudaba. Zonke izikole sizihlinzekile ngemali yokuthenga ukudla endleleni, amabhasi, ukudla enkundleni, amajezi nendawo yokulala.
"Sinqume ukuthi izikole zibuye- le emuva ngoMsombuluko ngoba ngeSonto sinohlelo lokukhuthaza ezokuvakasha.
“Bazokuya e-OR Tambo International Airport, bavakashele eTshwane ngeGautrain, badlule eSoweto lapho bezokuya khona eHector Pieterson Memorial Museum, babone nomuzi kaNelson Mandela bese bedla isidlo sasemini kuVilakazi Street okuwumgwaqo odume kakhulu eNingizimu Afrika. Sihlela nokuthi bayongena ngaphakathi eFNB Stadium okuyinkundla enkulukazi kuleli,” kusho uTshabalala.
Selulonke uhlu lwezikole ezizodudulana kulo mqhudelwano yilezi: iMophela (KZN), Sekusile (Mpumalanga), Isaac Booi (Eastern Cape), Phaphama (Free State), Idas Valley (Western Cape), Bankhara-Badulong (Northern Cape), Mmamitlwa (North West), Arcon Park (Gauteng) neHaggai Independent (Limpopo).