OWE-SUPERSPORT UYETHULELA ISIGQOKO I-SUNDOWNS
AKAKUPHUPHI ngisho elele ukuyodlala e-Europe uMorgan Gould oyisitobha seSuperSport United ezobhekana neHoroya yaseGuinea koweCaf Confederations Cup ngoMgqibelo ngo-17h00 ekuhambeni.
Le kilabhu izobuya kulo mdlalo ilungiselele ukugadulisana neCF Mounana yaseGabon ngempelasonto ezayo eLucas Moripe Stadium, e-Atteridgeville.
Isiphumele obala ngokuthi ifuna ukufinyelela kuma- alo mqhudelwano.
UGould utshele ILANGA ukuthi akaziboni edlala phesheya njengoba abadlali abaningi bakuleli belibangisa emaligini amancane akhona uma sebeqala ukuphelelwa wushatini ebholeni.
“Ngeke ngiyisebenzele imali engekho. Inhloso yami wukudlala kwiPremier Soccer League ngize ngibeke ethala amakhokho. Ngiyajabula nangokudlala kwiCaf Confederations Cup yize kungelula ukugijima e-Afrika. Amazwe akuleli lizwekazi aqhelelene kakhulu okuyinselelo enzima kubadlali bebhola abahamba amabanga amade.
“Yingakho-ke ngiyethulela isigqoko iMa- melodi Sundowns ngokubhekana ngempumelelo nazo zonke lezi zinselelo yakwazi ukunqoba iCaf Champions League ngonyaka odlule.
"Ngiyihlonipha kakhulu ngalokhu. Nathi siyafisa ukuhamba ezinyathelweni zayo,” kusho lo mdlali ojoyine iSuperSport esuka kwiKaizer Chiefs engakholelwa kakhulu kule miqhudelwano yase-Afrika.
Izintambo zokuqeqesha kule kilabhu sezizobanjwa ngu-Eric Tinkler onomlando omuhle e-Afrika njengoba ehole i-Orlando Pirates yafinyelela kowamanqamu weCaf Confederations eminyakeni embalwa edlule.