Izisebenzi zimise konke zifuna u-R5
Sebekhathele wukudlala umqashi
KUSUKE esinamathambo ngoLwesibili kwajama yonke into enkampanini ekhiqiza izincwadi zokubhala eVerulam, enyakatho yeTheku ngesikhathi izisebenzi zishisa amathayi zivimba kwasani oludlulayo ngoba zifuna ukukhushulelwa amaholo.
Kuze kwadingeka ukuba kubizwe amaphoyisa nezinkampani zonogada ukuzama ukulawula lezi zisebenzi saseNew Age Stationery ebezingezwa mshini zithi zihola amakinati.
Lezi zisebenzi zikhala ngokuthi umqashi uziholela u-R11,65 ngehora, okwenza zihole u-R1 040.00 emasontweni amabili. Zithe kazibuyeli emsebenzini uma umqashi engazinyuseli imali - esaqhubeka nokuziholela amakinati. Zikhala nangezimo ezisebenza ngaphansi kwazo zithi zizibeka ebungozini.
Ziveze ukuthi kazinikezwa ngisho izimfoyo zokuvala amakhala yize zibuye zisebenzise izinto ezinobungozi uma zike zazihogela. Ngesikhathi ILANGA lifika kule nkampani, isimo besimuncu njengoba izisebenzi bezihlukene kabili, kukhona ezifuna ukungena ngaphakathi zisebenze kodwa zivinjezelwe yilezi ebezitelekile. Ezitelekile bezicula amaculo omzabalazo, ziphethe izinduku kanti amaphoyisa nonogada bebeqaphe ngezinhlokohlela zezibhamu.
UNkz Zethu Hlophe, obengesinye salezi zisebenzi, uthi:
“Sesiside isikhathi sibekezele kule nkampani siholelwa amaki- nati, izimo esisebenza ngaphansi kwazo kazikho zinhle neze kangangoba kunenqwaba yabantu esike yalimala lapha emsebenzini.
“Kukhona osanda kunqanyukelwa wumunwe esikwa wumshini. Uma usebenza kawunikezwa ngisho isimfonyo sokuvala amakhala ukuvikela ukuhogela izinto ezisetshenziswa lapha.
“Sifuna umqashi asifakele u-R5 ngaphezulu kwale mali asinikeza yona ngehora. Ngeke siye ndawo futhi kasibuyeli emsebenzini uma engaqhamuki nesixazululo kulolu daba,” kusho uNkz Hlophe obevutha engabaselwe.
UNkz Senzi Mathunjwa naye obeyingxenye yombikisho, uthi kabakwazi ukuphila ngemali abayihola kule nkampani.
“Lapha emsebenzini ngisho kukhushulelwa abantu ezikhundleni, kakubhekwa ngapha kithina esinebala elimnyama. Selokhu safika lapha kasikhushulelwa ezikhundleni sisahola imali encane kodwa abanye sebaze bathenga izimoto emuva kokukhushulelwa ezikhundleni eziphezulu enkampanini,” kusho yena.
UMnu Thomas Mthembu weNational Union of Furniture and Allied Workers, uthi sebezamile ukuhlangana nomqashi ukudingida lolu daba kodwa inkinga aba- bhekana nayo wukuthi ubuye angafuni ukubanikeza isikhathi sokubalalela.
“Ugcine esithembisile ukuthi usazolubuyekeza lolu daba bese ebuyela kithina. Esingakusho manje wukuthi ngeke izisebenzi zibuyele emsebenzini uma kuwukuthi umqashi akaqhamuki nesixazululo esizwakalayo futhi esaqhubeka nokuqinisa ikhanda,” kusho uMnu Mthembu.
ILANGA lizamile ukungena ngaphakathi likhulume nabaphathi kodwa kwanhlanga zimuka nomoya njengoba litshelwe ukuthi kayikho imenenja okumele kukhulunywe nayo. Kwale ngisho seyishayelwa ucingo nakhona lapho yalandulwa.