ZIZOQINA EZOKUPHEPHA KWI-DUNDEE JULY YALO NYAKA
UKUNYUKA kwesibalo sabantu abahambela iDundee July ezokuba ngoMgqibelo eNdumeni ngaphansi koMasipala uMzinyathi kuphoqe ukuba abadidiyeli balo mjaho benyuse isibalo samaphoyisa nonogada abazokube beqaphe ukuphepha kwezihambeli.
Nonyaka kuzokube kugaduliswana emijahweni eyisi-8 esekwe ngengxenye yesigidi samarandi. Abadidiyeli bawo abakhulu uMnyango WezeMidlalo KwaZulu-Natal oholwa nguBongi Sithole-Moloi. Kuzokube kukhona amahhashi aphuma KwaZulu-Natal, awaseFree State, eWestern Cape, eMpumalanga nezinye izifundazwe nawaseLesotho.
Kulindeleke abantu abangaphezulu kwezi-20 000. Ngaphandle komjaho wamahhashi kuba nombukiso wengqephu nomculo. Bayacelwa osikhuni phambana nobhoko ukuba bangasondeli enkundleni yamahhashi kwazise ezokuphepha zizokube ziqinile.
Abadidiyeli bathi bazozama ngayo yonke indlela ukugwema isiminyaminya esiba khona kulo mjaho kwazise eminyakeni eyedlule bekuba ngumzukuzuku ukuphuma nokungena. Nonyaka bathi bazokube besebenzisana namatekisi endawo ukuletha abantu enkundleni yamahhashi.
NgoLwesihlanu ekuseni kuzokuba nombukiso wamahhashi ozokuba khona belu eDundee, lapho kulindeleke ukuba umphakathi uphume ngobuningi bawo uzozibonela.
Kuthiwa kabekho abantu abazovumeleka ukudayisa utshwala ngaphandle kwabanezimvume kanti imigwaqo eminingi kuthiwa izokube ivaliwe ukugwema isiminyaminya.
Ngesikhathi kuqhubeka amahhashi kuzokuba nesiteji lapho kuzokube kubukiswa ngengqephu edidiyelwe yiKwaZulu-Natal Fashion Council. Ngemuva kwayo kuzoqokwa iBest Dressed Female, iBest Dressed Male neMost Creative Designer.
Lo mcimbi kulindeleke ukuba uhanjelwe yizikhulu ezehlukene zepolitiki. Phakathi kwazo okukhona uNgqongqoshe WezeMidlalo wesifundazwe, izimeya namakhansela.