Usecasha ngonina oxoshwa yiChiefs
IBHOLA: Angase aqashelwe isekela lesibili uMphathi
USECASHA ngonina umdlali oxoshwe yiKaizer Chiefs imsola ngokuba yifenisha kule kilabhu esembhidlangweni wokulwela ukubuyisa isithunzi.
ILANGA lithole ukuthi uSiphelele “Shaka Zulu” Mthembu oxoshwe yiChiefs uzama konke okusemandleni akhe ukuthola umsebenzi omusha ngaphambi kokuqala kwesizini entsha. Nokho abasondelene naye bathi kusemnyama okwamanje.
Lo mdlali ngesikhathi ethintwa yileli phephandaba izolo ngoLwesithathu, ukhale ngomhlangano awubambe nonina. Ucele ukuthintwa emuva kwemizuzu eyisi-5 kanti emuva kwalokho ubengasalubambi ucingo lwakhe. Nangeledlule lo mdlali wenze okufanayo kuzanywa ukuxoxwa naye ngekusasa lakhe.
Imenenja yalo mdlali, uMiguel Paiva weLuso Africa Player Management, ithe bazama konke okusemandleni ukumtholela ikhaya elisha emuva kwempilo engahambanga kahle eNaturena.
“Njengamanje kakukho engingakusho ngoSiphelele ngoba kusathule kuleli sonto. Mhlawumbe ngelizayo kukhona okuzokube sekubambeka,” kushaya ngamafuphi uPaiva.
Lo mdlali uqede isizini edlule evele esenuka iqaqa kwiChiefs ebifuna ukumxosha isaqala kodwa kwabamba inkontileka.
IChiefs kulindeleke ukuba kucace ukuthi iphetheni kule sizini emqhudelwaneni iBokone Bophirima Maize Meal Spectacula ezokuba ngoMgqibelo eJames Motlatsi Stadium, e-Orkney.
Kulo mqhudelwano kuzovula iPlatinum Stars neFree State Stars ngo-10 ekuseni kuthi iChiefs igadulisane neTownship Rollers ngo-12 emini. Owamanqamu uzokuba ngo-16h00.
KwiFree State kubhekeke u-Edward Manqele oshaye ibuya kule kilabhu yakwaMokoena ayishiye kumasizini ambalwa edlule ejoyina iSundowns abhinjelwe yizinto kuyona njengoba egcine esekwiChiefs nakhona wabhekwa yisambane wakhumbula emuva.
KwiChiefs amehlo azogxila kuPhilani Zulu obekwiMaritzburg United, uTeenage Hadebe waseZimbabwe abasanda kujoyina le kilabhu esiyehlelwe yisithunzi ngendlela exakile njengoba ingenzi kahle emiqhudelwaneni emikhulu yePremier Soccer League (PSL).
* Kuzo ezeChiefs, iyaqina imibiko ethi uSerame Letsoaka angase aqokwe njengesekela lesibili likaSteve “Mphathi” Komphela ongumqeqeshi osizwa nguPatrick Mabedi osanda kuthatha indawo kaJohn Paintsil waseGhana okhonjwe indlela.