EZIFINGQIWE:
UMODISE USEQALILE UKUJIMA NECITY
UTEKO Modise uqale ukujima neCape Town City izolo ngoLwesithathu emuva kokusayina inkontileka yeminyaka emibili nale kilabhu eqeqeshwa nguBenni McCarthy. Kulindeleke ukuba ayibambe esiswini noAyanda Patosi neLyle Lakay oboshwa yiBloemfontein Celtic ngokujoyina le kilabhu noLebogang Manyama oshelwa ngamakilabhu amakhulu aseGauteng. UModise ushiye iDowns ecikwa yibhentshi kule kilabhu ecijwa nguPitso “Jingles” Mosimane.
UCOETZEE USEBANGWA YI-CHIEFS NEBUCS
URIVALDO Coetzee oyisitobha se-Ajax Cape Town kuvela ukuthi usebangwa yiKaizer Chiefs ne-Orlando Pirates kuphela emuva kokuhoxa emjahweni wokuzama ukumsayinisa kweMamelodi Sundowns. UCoetzee kubikwa ukuthi akakaze alubhade ejimini ye-Ajax selokhu iqale amalungiselelo esizini ezayo. Kuzo ezeChiefs, kuthiwa ingase iphuthwe wukuthola uNdumiso Mabena embanga neCeltic. Kuthiwa iChiefs ibhala iyacisha ngoMabena.
OWE-ARROWS USHWEBISE I-KINGS WAQOMA I-EAGLES
USHWEBISE iReal Kings United waqoma ukubolekiswa kwiRoyal Eagles umdlali weLamontville Golden Arrows. ILANGA lithole ukuthi uKwanele “Dj” Hlongwane ogijima esiswini kuBafana Bes’thende unqabe ukuya kwiKings ebimfuna uthuli wanxusa ukuhanjiswa kwi-Eagles ebunjwa kabusha njengoba abaphathi bayo behlose ukudla ubhedu kwiNational First Division (NFD) ngokuphela kwale sizini.
INATAL IZAMA UKUTHENGA UTHUKELA FC
INATAL United ingase ikhuze ibuya kwiSouth African Football Association (Safa) KwaZulu-Natal ABC Motsepe League emuva kokuhaliswa yiReal Kings United neThongathi FC asebenyukele kwiNational First Division (NFD) ngokwahlukana kula masizini amabili adlule. Kuthiwa izikhulu zeNatal zizama ukuthenga Uthukela FC lukaSimphiwe Hadebe osekukaningi ezama ukuhlukana nonobhutshuzwayo. Sekuwumlando ukuthi izikhulu zeNatal zidayise ikilabhu yazo ezikhulwini zakwaKwaDukuza eziyiqambe ngeKwaDukuza United.
IKHONJWA E-CHATSWORTH ISOBANTU
ISOBANTU Shooting Stars kaMpume Skhosana kuvela imibiko ekhomba ukuthi ithengwa yiSummer-Field Dynamos ezinze eChatsworth. Nakuba izingxoxo zingakaphothulwa kodwa leli phephandaba lithole ukuthi abaphathi bala makilabhu sebeke bahlangana. UMusa Ndlela ongesinye sezikhulu zeSobantu ukuphike walala ngentaba ukuthi le kilabhu isendalini.