Lingase ligawule izembe kwabe-ANC
Ukufungiswa kukaNkosazana Dlamini-Zuma kuzoba nomthelela
AMANYE amalunga e-African National Congress (ANC), abona ukubuyela ephalamende kukaDkt Nkosazana Dlamini-Zuma njengokuhlahlela uMengameli Jacob Zuma indlela yokuphuma ngapha- ndle kwezihibe kuhulumeni uma sekuqokwe ozongena esikhundleni sakhe sokuhola i-ANC engqungqutheleni yaleli qembu engoZibandlela (December) nonyaka.
UDkt Dlamini-Zuma kulindeleke ukuba aqokelwe kwikhabhinethi kaMengameli Zuma, okuzoba wumlabalaba wephalamende we- sibili kulo nyaka emuva kowokuqala wangoNdasa (March) lapho kukhale izembe kuMnu Pravin Gordhan obengungqongqoshe wezezimali nesekela lakhe uMnu Mcebisi Jonas.
Abafuna uDkt Dlamini-Zuma abengumengameli olandelayo weANC, kubikwa ukuthi behlukene phakathi njengoba kukhona abacabanga ukuthi lokhu kungaphazamisa umkhankaso wabo.
Lo mholi oke waba ngungqongqoshe wezempilo, owezangaphandle nowezasekhaya, ngomunye wabantu abagaqele ukuhola i-ANC, imbangi yakhe enkulu nguMnu Cyril Ramaphosa oyisekela likamengameli. Abanye abagaqele lesi sikhundla kubalwa uNkz Baleka Mbete, uNkz Lindiwe Sisulu noMnu Mathew Phosa.
Abalandeli bakaDkt Dlamini-Zuma bathi ukubuyela kwakhe ephalamende yindaba osekunesikhathi idingidwa. Bakholwa wukuthi ukufakwa kwakhe kwikhabhinethi manje, kungenza kube lula ukuba uMengameli Zuma ehle esihlalweni sokuhola izwe ngokuqala konyaka ozayo, adedele yena (uDkt Dlamini-Zuma) - inqobo nje uma enqobile engqungqutheleni ye-ANC ngoZibandlela.
“Yindaba endala leyo,” kusho ilunga leNational Working Committee ye-ANC eli- ncinda odengezini lukaDkt Dlamini-Zuma.
“Sikhulumile ngendaba yokuthi ubaba (Mengameli Zuma) ucabanga ukushiya ngaphambi kokuphela kwehlandla lakhe, cishe emuva kwengqungquthela engoZibandlela. Uzama ukunqanda le nto yabaholi ababili, ozohola i-ANC nozohola izwe, ngakho-ke sidinga (uDkt Dlamini-Zuma) ukuba abeyilunga lephalamende ukuze kube nguyena othatha izintambo kumengameli.
“Kusamele sihlangane sidingide eyokuthi kumele yini afakwe kwikhabhinethi. Empeleni nje umuntu osezingeni lakhe udinga isikhundla esiphezulu,” kusho leli lunga. UDkt Dlamini-Zuma ukhonjwa ephalamende nje, uyashisa umncintiswano wesikhundla sikamengameli we-ANC, kuqhamuka namatwayitwayi abikwa ngabaholi abathile.
Ngesonto eledlule uMnu Ramaphosa ufane nentibane evinjezelwe ngamachalaha onqenqemeni ngesikhathi ecindezelwa ukuba avume ukuthi ubejola nenqwaba yabesifazane kodwa eganiwe emuva kokuba kuputshuke izibhalonyazi ( e-mails) ezithi “ubeyisoka lamanyala” yize eshadelwe.
Uvumile ukuthi ukhona owesifazane ajole naye kodwa behlukana eminyakeni eyisi-8 edlule. Usole izitha zakhe ngokuputshuza lezi zibhalonyazi zisebenzisa izinsiza zezobunhloli zikahulumeni.
Eminye imithombo iqagula ukuthi ngaphandle kokushintsha kwekhabhinethi, ukubuya kukaDkt DlaminiZuma kungenza ukuba kushintshwe nekhokhasi ye-ANC ephalamende - kukhale imbazo kuMnu Jackson Mthembu ozwakale evikela uMnu Ramaphosa ngeledlule ethi uzoqhubeka nokweseka lo mholi kwesokuba ngumengameli yize enanyekwa ngamahlazo.
NgoMgqibelo uMnu Mthembu ubengayiboni ingozi emlengelayo esikhundleni sakhe (sokuba ngusotswebhu we-ANC ephalamende) njengoba ethe uma kuwukuthi isigungu esiphezulu seqembu lakhe sinquma ukumchitha, uyokwamukela lokho.
“Bengingakatshelwa lutho kodwa uma kunesinqumo esinjalo esithathwayo (sokumchitha), ngeke ngilokhu ngitibila,” kusho uMnu Mthembu. Uthe uyohlala phansi noDkt Dlamini-Zuma badingide ukuthi yikuphi lapho angabamba khona iqhaza njengoba enzile nakwamanye amalunga ephalamende amasha ngaphansi kwefulegi le-ANC.
Uthi uDkt Dlamini-Zuma akakhishwanga ohlwini lwe-ANC kuzwelonke ngowezi-2014 ngakho-ke uthatha ilungelo lakhe lokuba yilunga lephalamende. UNobhalajikelele we-ANC Women’s League (ANCWL), uNkk Meokgo Matuba, uthe abalandeli bakaDkt DlaminiZuma kabanandaba nokuthi umkhankaso wakhe ngeke uphumelele ngoba njengomuntu wesifazane, lo mholi uyakwazi ukwenza izinto eziningi sikhathisinye.
UDkt Dlamini-Zuma kulindeleke ukuba afungiswe noMnu Matthew Wolmarans oke waba yimeya yaseRustenberg. UNobhalajikelele we-ANC, uMnu Gwede Mantashe, uvumile ukuthi uDkt Dlamini-Zuma uzofungiswa njengelunga lephalamende kodwa wathi akazi noma uMengameli Zuma uzomqokela yini kwikhabhinethi yakhe - ngoba nguyena onalawo mandla.