Obentshontsha izingubo usevule esakhe isitolo
Ugajwe wuthando lwemfashini
SEPHENDUKILE” wavula isitolo sezingubo zokugqoka endaweni yokungcebeleka, iMax Lifestyle kwaV eMlaza, eningizimu yeTheku obeziphilisa ngokuntshontsha izingubo zokugqoka ezitolo azidayise.
UMnu Mandla Mhlongo (55), uthi uthando lwezemfashini ngenye yezinto emenze ukuba agcine esevule isitolo sakhe sezingubo esibizwa ngeMlazi Lifestyle Fashion.
Uthi kade lwamgabha uthando lwemfashini njengoba ethi uze antshontshe nje, yingoba ubenothando lokugqoka izimpahla ezibizayo abukeke kahle.
Ekhuluma neLANGA, uMnu Mhlongo - osenenqwaba yamabhizinisi - uthi ubengangeni ezitolo ezifana noCasanova aphume engantshontshanga lutho oluzomfanela.
Uthi kuhambe kwahamba, ngokukhula wabona ukuthi usefuna ukuphila impilo eqondile waqala ibhizinisi lakhe.
"Bese ngikhathele nawukuboshelwa ukuntshontsha. Yize bekungelula ukuvula le ndawo, kodwa kungisizile ukudayisela ekhaya njengoba ngingene lapha sengivele nginawo amakhasimende ami abengeseka ngisasebenzela ekhaya.
"Ngesikhathi ngisaqala, izingubo bengizi-oda eChina kodwa manje sengi-oda eTurkey njengoba ibhizinisi selidlondlobele,” kusho uMnu Mhlongo.
Kuleli bhizinisi lakhe udayisa ingqephu yabesilisa kuphela ngoba yiyona ayazi kangcono.
Owesilisa umgqokisa kusuka phansi kuyophuma phezulu njengoba kukhona izicathulo, amabhulukwe, amabhande, amahembe namasudi kanokusho.
Uqashe umuntu oyedwa kulesi sitolo sakhe kanti uma esezibala zonke izisebenzi zakhe ezikwamanye amabhizinisi, uthi zingama-25.
UMnu Mhlongo waziwa kakhulu ngokuba yigcokama lensizwa edla ukotini kusuka phansi kuyoshaya phezulu.
“Ngifuna ukukhuthaza intsha ukuba ingalilahli ithemba, ikakhulukazi uma ibona izinto zingenzeki empilweni. Ingayikhohlwa imfundo ngoba iyisikhiye sempilo, ngaphandle kwayo ngeke wenze lutho. Okunye okubalulekile, wukubekezela uma izinto zingakahlangani, ungajahi ukuthatha izindlela ezinqamulelayo.
"Mina ngazithatha ngangena ejele. Ubugebengu kabubuyiseli ngalutho kodwa kunalokho kubalulekile ukuba usukume uzithathe ubheke ukuthi yiliphi ibhizinisi ongakwazi ukuziphilisa ngalo kunokuba uphenduke into yejele.
"Mina ngibe nenhlanhla yokuphuma ngiphila, abanye bafela kubona,” kusho yena.
Utshele leli phephandaba ukuthi unelinye ibhizinisi lezokwakha asebenzisana kulona noNkk Shawn Mpisane ngaphansi kweziKhulise nelama- metered taxi alenza nabakwa-Uber.
UMnu Mhlongo uke wabonakala nasemdlalweni kamabonakude uZalo, olukhonjiswa kwaSABC 1 ngoMsombuluko kuya kuLwesihlanu ngo-20h30.
Ubedlala indawo yomphathi wejele obekuboshwe kulona uNkunzi (Masoja Msizi) yena enguNyambose.
Uthi ukungena kwakhe emkha- kheni wokulingisa bekuyisifiso sakhe sakudala. Ungene kulo mkhamkha wokulingisa ngokusizwa nguThabo Mnguni owaduma ngelikaBra Steve kwiFamily Bonds edlala noMandla “Bhongo” Thabethe ongasekho.