ISIBHEDLELA SIYAZIQHENYA NGOMHLENGIKAZI WASO
UCHONYWE uphaphe lwegwalagwala umhlengikazi wesilisa wasesibhedlela iZithulele esiseMqanduli, e-Eastern Cape, ngemuva kokusindisa owesifazane obebhajwe emotweni ebicwila emanzini.
Lesi sibhedlela sikhiphe isitatimende enkundleni yezokuxhumana siziqhenya ngoMnu Ayanda Sitela (28) osindise owesifazane sekuvalwe amehlo yize ebengekho emsebenzini ngaleso sikhathi.
Ngokusho kwesitatimende salesi sibhedlela, uMnu Sitela ubone imoto iphonseka emfuleni okuthe uma umshayeli wayo esephumile washo ukuthi kunowesifazane ovalelekile ngemuva. Le ngozi yenzeke emasontweni amabili edlule khona eMqanduli.
Leli phephandaba lixoxe noMnu Sitela, ovumile ukuthi lokhu kwenzekile wathi ubengazitsheli nokuthi kungagcina kuyindaba engaka ngesikhathi ekwenza.
“Bengisetekisini kukhona lapho bengiphuma khona, kube sekwenzeka le ngozi-ke. Ngibone umshayeli ephuma ngaphuthuma ngaya khona, wathi kunowesifazane ovaleleke ngemuva ogwilizayo,” kusho yena ngezwi eliphansi.
Uthi ngaleso sikhathi imoto beyibheke phansi, okuphoqe ukuba acele abanye abebekhona ukuba bayiphendule ukuze bakwazi ukukhipha obengaphakathi.
“Ngaleso sikhathi ubesequle- kile, engasaphefumuli nhlobo.
“Ngiphefumulele emlonyeni wakhe ukuze akwazi ukukhipha amanzi abesengene emaphashini. Uphaphamile kodwa kwabonakala ukuthi isimo kasisihle,” kusho yena.
Uthi ngesikhathi ezama ukumsiza lona wesifazane, abanye bashayele abosizo lokuqala kwatholakala ukuthi i- ambulance izokwazi ukufika ngemuva kwamahora amabili.
“Ngibonile ukuthi ngeke akwazi ukulinda amahora amabili ngacela abanye abebenemoto ukuba bamphuthumise emtholampilo oseduze. Mina kangibange ngisaya lapho, ngithole ngabaphathi bami ukuthi ususwe kulowo mtholampilo wadluliselwa esibhedelela engisebenza kusona.
“Uhlale esibhedlela izinsuku ezine welulama, wagoduka. Kangizihluphanga nangokuthatha imininingwane yakhe ngoba engikujabulele nje wukuthi usindile,” kusho yena.
Uthi ubengaqondile ukuba yiqhawe ngalokhu akwenzile kodwa uyacabanga ukuthi yingoba uyawuthanda umsebenzi wakhe, okuwukuphilisa abantu, okuyikhona okumenze wangacabanga kabili ngaphambi kokuba alekelele lona wesifazane,” kusho yena.