UTAU NESETHEMBISO KUBALANDELI BE-DOWNS

UTHEMBISA into yamehlo uPercy Tau ongumdlali weMamelodi Sundowns osephenduke isilomo kubathandi bebhola baseNingizimu Afrika.

IDowns izodudulana neWydad Casablanca yaseMorocco kwiquarter final yeCaf Champions League ngeSonto ngo-15h00 eLucas Moripe Stadium, e-Atteridgeville. IDowns iya kulo mdlalo nje, ibuyelwe wukuzethemba iguqisa iFree State Stars ngo-2-1 kowe-Absa Premiership ngoMsombuluko kusihlwa eGoble Park Stadium, eFree State.

UTau ushaye amagoli amabili ezakhe zidlala neFree State, kanti uthi abantu bazobhema bakholwe kulo mdlalo weCaf.

“Umdlalo wethu neFree State ubuyise ukuzethemba emuva kwesibhaxu sePolokwane City. Leli khefu lisisize kakhulu, sikwazile ukuzinuka amakhwapha. Abantu bazobona ibhola eliseqophelweni eliphezulu ngeSonto lokho kangikungabazi. Sizizwa sizelwe kabusha njengoba sibe nesikhathi sokulungisa amaphutha.

Sisemdlandleni wokubhekana nanoma iyiphi ikilabhu. Noma kanjani lo mdlalo sizowunqoba ukuze siye kubona sesiyoshayelela isipikili sokugcina,” kusho uTau.

IDowns izokuya kulo mdlalo sekubuye abadlali bayo abamqoka abebengekho idlala neFree State. UHlompho Kekana uzoshaya ibuya noKhama Billiat obenokuthinteka. UTau ukhuluma kanjena nje, le kilabhu ilibeke ngesihloko elokuthi iDowns kayiyesabi.

Ngaphandle kwalokho iveze ukuthi ifuna ukuqeda ishobolo leminyaka engama-25 ingayinqobi le nkomishi. Igcine ngowe-1992 ukuqukula le nkomishi. IDowns inqume ukuba bangene mahhala abalandeli abazoza enkundleni befake imibala yekilabhu. Abangayifakile bazokhokha u-R20. Lo mdlalo uzoboniswa kwiSS9.