UJacob Zuma ubizwe ngenkalankala
Bakhala ngohulumeni wakhe kolwaseLife eSidimeni
UBIZWE ngenkalankala kuzwa izwe lonke uMengameli Jacob Zuma ( osesithombeni) ngoLwesibili ngesikhathi kuqhubeka isigcawu sokwethulwa kobufakazi mayelana nokufa kwabantu abali-141 abebegula ngengqondo, abasuswe wumnyango wezempilo esikhungweni iLife eSidimeni, eGauteng bayiswa ezikhungweni ezizimele.
Ezinye zalezi zikhungo abathuthelwe kuzona bezingekho emthethweni.
Usihlalo walesi sigcawu yijaji eselithathe umhlalaphansi, uJustice Dikgang Moseneke.
Owesifazane onguNkk Ntombifuthi Dladla - oshonelwe ngumfowabo, uMnu Joseph Gumede ngoNtulikazi (July) nyakenye - ubevutha engabaselwe njengoba eze wabiza umengameli ngalesi silwane esihamba lukeke esihlala emanzini nasodakeni.
UMnu Gumede ususwe eSidimeni wayiswa eCullinan Care and Rehab Centre. Ngesikhathi ethula ubufakazi bakhe uNkk Dladla, ubelokhu esikhihle njalo isililo, kubonakala ukuthi ukuqhubeka kwalesi sigcawu kumthunuka amanxeba.
ICullinan Care and Rehab Centre kubikwa ukuthi empeleni bekungeyona indawo elungele ukubheka abantu abagula ngokomqondo kodwa bekungeyokuhlunyeleliswa kwezimilo.
Elanda uNkk Dladla, uthi nakuba umfowabo eshone ngoNtulikazi nyakenye kodwa bona njengomndeni baze baziswa ngakho ngoNhlolanja (February) nonyaka.
Uthi kube nzima kakhulu ngesikhathi befika emakhazeni kahulumeni eMamelodi, enyakatho yePretoria, beyobona isidumbu somfowabo. Bafice isidumbu sisesimeni esishaqisayo, sesonakele, sinuka phu, kunzima nokungena njengoba bebenganikeziwe nezimfonyo zokuvimbela iphunga.
Indlela obekunzima ngayo kuNkk Dladla ngesikhathi ethula ubufakazi, kukhona lapho uJustice Moseneke emise khona isigcawu okwesikhashana, ngesikhathi abezimo eziphuthumayo behlenga uNkk Dladla. Ekhuluma ekhala, egcwele izinyembezi emehlweni, uthe ngeke aze amxolele uNkk Qedani Mahlangu obengungqongqoshe wezempilo eGauteng, okunguyena ogunyaze ukuba kususwe abantu eLife Esidimeni. “Negama lakhe liyamfanela, ubaqedile abantu (uQedani Mahlangu),” kusho uNkk Dladla.
Ngasekupheleni kokulalelwa kobufakazi bukaNkk Dladla, u-Adv Tebogo Hutamo omele uhulumeni, udlulise amazwi enduduzo kuye, kwathi ngesikhathi bemnika ithuba lokuba aphawule, uNkk Dladla wathi: “Okungicasulayo nje kunakho konke, kwathi uma kuvulwa iphalamende, iDA (Democratic Alliance) ikhuluma laphaya, icela ukuba makugotshiwe amakhanda kukhulekelwe laba bantu abashonile, umengameli wethu, umengameli wethu, wenqaba. Wenqaba! Kungani? Kungani?
"Yingoba ibingamethu- si le nto eyenzekile. Ubeyazi ukuthi izokwenzeka ngoba ukuba ibimethusile ngabe wavuma ukugobisa ikhanda wakhuleka.” UJustice Moseneke ubuze ukuthi kakuyena yini usomlomo wephalamende onqabe lokho na.
UNkk Dladla uphendule wathi: "Kangisakhumbuli kahle jaji kodwa nje khona laphaya ephalamende njengomholi wethu (uMnu Zuma) yena bekufanele ame ukuze kwenzeke lokho, ngoba uyinkalankala, yingakho nabantwana bakhe behamba njengezinkalankala.”
Ngemuva kwalokho, utolika uke wazwakala ebindeka.
Ube eseqhubeka u-Adv Hutamo wathi: “Siyathemba ukuthi njengoba siqhubeka lesi sigcawu somlamuli, sizosithola isiphetho esifanele nokuthi ekugcineni ubulungiswa buzokwenziwa.”
Uphawulile noNkk Dladla ngokufuthelana wathi: “Ngiyabonga kodwa kangazi ukuthi uzosiduduza kanjani (uhulumeni) noma ngemali yabantu baseNingizimu Afrika yentela noma izobe iphuma esikhwameni sakhe yini.
"Ukuba le mali yentela uyisebenzisele laba bantu abagulayo ngabe kasikho la. Imali ngeke isivale isikhala somfowethu.”
Ngaphambi kokuba asukume esihlalweni sofakazi, uphawule ebhekise kuJustice Moseneke, wathi: “Ngifisa ngabe leli lizwe liphethwe nguwe nkos’ yami.”
UJustice Moseneke ubonakale eshaywa ngamahloni, wanikina ikhanda, wamoyizela.
Ukulalelwa kwesigcawu kuyaqhubeka namhlanje ngoLwesine nakusasa.