UGWETSHWE IZINSUKU EZINGAMA-30 OWENSANGU
UGWETSHWE izinsuku ezingama-30 “etadisha” ijele noma akhokhe inhlawulo ka-R500 umfundi waseNdamkane High School eSohlangwini, eNgwavuma, enyakatho-mpumalanga yeKwaZulu-Natal, olahlwe yicala lokutholakala nomthunzi wezinkukhu ngesikhathi sokufunda.
USiyabonga Mathenjwa (20), ofunda uGrade 11 kulesi sikole, ulahlwe ngecala yiNkantolo yeMantshi yaseNgwavuma ngoMsombuluko, okuyilapho ezivumele ukuthi uyayibhema insangu.
Imantshi, uMnu Douglas Ngcobo, ilahle lo mfundi ngaleli cala esekwe ngabanye ozakwabo okunezinsolo zokuthi uyihuqa nabo insangu emuva kwalokho baqale ukusabisa othisha esikoleni.
ILANGA lihabule ukuthi nasemphakathini uwuhlupho lo mfundi nabangani bakhe osekwaziwa ukuthi banendawo yabo yokudlela izidakamizwa.
Le ndawo isehlathini eliseduze kwalesi sikole. Umsolwa ugwetshwe noma bemkhulekela bephakamise isiga (inombolo) abasenza uma sebehlangene beyobhema.
USiyabonga ubemelwe ngu- Adv Senzo Zindela amthole ngosizo lukahulumeni. Kwale noma esencengelwa ngummeli wakhe ukuba angagwetshwa ngoba sekuzoqalwa ukubhalwa kwezivivinyo zokuphela konyaka.
“Ngesizathu sokuthi ikilayenti lami liyaqala ukulahlwa yicala futhi kalibambezelanga njengoba lizivumele ngokwalo icala, ngicela ukuba inkantolo ilikhulule. Uma kwenzeka limgweba, ngicela ukuba ahlawuliswe imali engaphansi kuka-R500.
“Okunye umsolwa insangu uyisebenzisa yena, kakukhona ukuthi ubeyoyithengisa,” kuncenga u-Adv Zindela.
Imantshi inxuse umsolwa ukuba ahlukane nokusebenzisa insangu ngoba usengcupheni enkulu yokugula ngekhanda.
“Insangu iyisihlahla esingagu- nyaziwe wumthetho wezwe. Kuyicala ukuyisebenzisa bese ungena phakathi kwabantu.
“Ngenxa yokuthi ziningi kakhulu izigameko ezimbi ezidalwa ngabantu abasuke sebebheme insangu, ngiyanxusa ukuba uhlukane nokuyisebenzisa ngoba uzibeka engcupheni yokugula ngekhanda.
“Lokho kuwukuhlukumeza abantu baseNingizimu Afrika ababanjelwa intela ngoba uma usugula kuzothathwa emalini yabo kwelashwe wena. Ufanelwe wukudonsa isigwebo eside ukuze nabanye ozakwenu bezothola isifundo. Uzogcinwa ejele izinsuku ezingama-30 okanye ukhokhe inhlawulo ka-R500 udonse isigwebo ungaphandle,” kusho imantshi.
Kuyicala ukuyisebenzisa bese ungena...