Idili lomculo kunikelelwa abaswele
Kakungenwa ngamali kodwa kungenwa ngomnikelo
UBOPHELE izingqungqulu umcimbi kamasikandi ongoMgqibelo eMhlathuze Sport Complex, eRichards Bay, ogwini olusenyakatho yeKwaZulu-Natal, okuhloswe ngawo ukushintsha impilo yabafundi abaswele ezikoleni ezingaphansi kukaMasipala waseMhlathuze.
Lo masipala uqhamuke necebo lokunikelela abafundi abadonsa kanzima ngokuhlela idili likamasikandi. Kunxuswe umphakathi ukuba ufike kuleli dili neminikelo yezicathulo zesikole ngenxa yokuthi umasipala ubone sikhula isibalo sabafundi abazeswele. UMhlathuze uphinde usize abesifazane ngemisubelo. Okhulumela lo masipala, uMnu Mduduzi Ncalane, uthi njalo uma kuqalwa unyaka, ubuholi bawo buvakashela izikole busize abantwana abaswele, okuyilapho kubonakale khona ukuthi kuningi okumele kwenziwe ngokubambisana nomphakathi ukuze kulekelelwe abangakwazi ukuzisiza. Utshele ILANGA ukuthi ngalo mcimbi bahlose ukwenza umehluko kule ndawo ukuze ziwuqale kahle izingane unyaka zijabule. “Sibone ukuthi masenze uhlelo lokuqoqa izicathulo kusenesikhathi ukuze uma unyaka uqala sizihambise ezikoleni. “Zizoyiswa ezikoleni uma sebehlonziwe bonke abantwana aba- swele.
“Sinqume ukuthi makungangenwa ngemali kulo mcimbi kodwa bonke abantu bazongena ngomnikelo wezicathulo noma imisubelo esangweni. Ngalokhu sifuna ukufaka isiko lokupha kubantu ngoba lezi zinto ziyingxenye yempilo,” kusho uMnu Ncalane.
Uveze nokuthi izinto eziningi abantu baseMhlathuze bazibukela kude ngoba zenzeka emadolobheni anjengeTheku, yingakho behlelelwa leli dili elinabaculi ababathandayo.
Utshele leli phephandaba ukuthi bazohlonipha nomakadebona kamasikandi uSipho “Thwalofu” Khoza ngoba udabuka ngaphansi kukaMasipala iKing Cetshwayo - ongunina kaMasipala waseMhlathuze - futhi sekunabaculi abaningi abasebenze naye abaphumelele manje.
Uthi yingakho beqashe neqembu likamasikandi iZingane Zoma emcimbini - ngoba sekunesikhathi eside liyibambile - kule ndima ukuze kuzokhuthazeka nentsha yesifazane yaseMhlathuze ethanda ukungena kwezobuciko.
Kubaculi abazoshiyelana inkundla kubalwa uMjikijelwa, oSaziwayo, uKhuzani, uQhosha, iGcokama Elisha, uSgwebo se- ntambo, Amageza Amahle, iZingane Zoma, uCevuzile noThokozani Langa.