Uthishanhloko bekufanele alusukumele lolu daba AVE NGIBATEKETISA NAMI ABANTU
SIYAKUQONDA ukuthi sonke singabantu, siyafika isikhathi sokuba sihluthuke sigcine senza izinto eziphambene nokulunga, kodwa into okubikwa ukuthi yenziwe nguthisha wesifazane waKwaSithebe Primary School, KwaSithebe, eMandeni, ogwini olusenyakatho yeKwaZulu-Natal iyasethusa futhi kuyasidida ukuthi uthishanhloko uthule wathini.
NgoMsombuluko ILANGA libike udaba lomfundi okuthiwa ufunzwe umsubelo ( pad) nguthisha wakhe okuthiwa vele yinto yakhe ukumhlukumeza njengoba kubikwa ukuthi uke wambiza ngemfene ehlala nezinkawu kubo. Noma ngabe kuthiwa uthisha ubengamphiwe lo mfundi - singazi ukuthi uzoze angamphiwa nje kwenzenjani - kodwa sicabanga ukuthi njengomama futhi onguthisha, bekufanele aqaphele indlela aphatha ngayo izingane.
Uthishanhloko bekufanele alubike emnyangweni lolu daba nawo uphuthume ulusukumele, ungawuhlabi inhlali. Okudidayo wukuthi nomzali walo mfundi uvele wazenza ihlaya ezenza into engazi nhlobo ngalolu daba. Sibona ethengise ngayo ingane yakhe. Siyawubonga umthombo weLANGA oveze lolu daba njengoba ingane kuthiwa ibingasayi esikoleni yisaba ukuthi kayazi kuzolandelani emuva kokufunzwa umsubelo.
Siyanxusa ukuba othisha babe nendlela enesithunzi yokujezisa abafundi, hhayi le yokuhlekisa ngezingane ngoba nakhu zingenamandla okuzivikela futhi kwaziwa ukuthi nabazali bazo ngeke bathi vu. Sinxusa uNgqongqoshe wezeMfundo KwaZulu-Natal, uMnu Mthandeni Dlungwane asukume nenkalivasi abhule amajazi alabo thisha abangafuni ukuhlukana nokwephula umthetho - behlukumeza abafundi. Siyazi ukuthi nabo abafundi kabekho msulwa kodwa kunezinto okungamele zenziwe kubona yize behlupha benjalo.
Phela othisha bafana ncimishi nesikhombandlela (compass), izingane zizoyazi kanjani indlela okumele ziziphathe ngayo uma uthisha - okunguyena okumele azikhomise inyathuko - eziphatha ngale ndlela? Njengoba besesishilo, siyakuqonda ukuthi nabo othisha bangabantu kodwa kumele bakhumbule ukuthi izinto abanzeza kubafundi bazenza ebantwini.
Noma kunjalo, uma ukwazi ukwehlisa isithunzi somfundi ngokumfunza umsubelo, siye silindele ukuthi abakuphethe noma umthetho ukuzwise ubuhlungu obuzokwenza ungaphinde wenze okubuhlungu komunye umuntu.
Kuyasethusa nje ukuba uthisha akakaze athathelwe zinyathelo noma-ke nje axwayiswe. Lokhu kukhomba ukuthi uthishanhloko nabanye othisha kulesi sikole bavumele ukukhohlakala abanye baba ngamavaka, bangayibika le ndaba engaka. Le ngane izokhula nesilonda, mhlawumbe igcine ingabathandi othisha njengoba ibingasafuni nje ukuya esikoleni.
Besingafisa nokuba umnyango wezemfundo uzame indlela lo mfundi angalulekwa ngayo ngokomqondo ngoba angaphindela esikoleni ezitshela ukuthi kuzoba ngcono kanti ngaphakathi isilonda siyabhibha. Ibuhlungu into eyenziwe kulo mfundi. Izimo ezinjengalezi zenza abanye abazali bathi besemsebenzini balokhu bebikelwa ukuthi ngabe izingane zabo zisaphephile yini kule migilingwane ebikwayo ukuthi yenziwa ngothisha ezinganeni.
Siyacela ukuba othisha banikeze abazali isiqiniseko sokuthi izingane zabo ziphephile uma zinabo ezikoleni ngoba bazinikela kubo (othisha) ngoba bethemba ukuthi zizothola imfundo - hhayi ukuhlukunyezwa. MHLELI: Ngisukunyiswa yinansi indaba oke wayikhipha phambilini kwiphephandaba ILANGA LangeSonto yokuteketisa umuntu ongamjwayele kangako.
Ngicabanga ukuthi lena oyishoyo iyaye idalwe wukuthi umuntu ojwayele ukuteketisa usuke ethanda abantu futhi engumuntu ozikhululekele bese ethatha ngokuthi wonke umuntu uzoyithatha kanjalo le nto yokuteketisa.
Ngingomunye wabo mina futhi kuyaziphumela Nkosi yami, kangenzi ngabomu. Okunye wukuthi empilweni ngikakwe ngabantu abayithokozelayo indlela yami yokwenza.
Kusuka emndenini kuya kubangani nakomakhelwane ngabantu esikhulukelene nje nabo. Ngikuthola kulula ukuba ngithi kumuntu: dear, my angel, my love, honey.
Uyazi ngisho esitolo bebuza o- cashier ukuthi ngiyawudinga yini u- plastic ngiyaye ngithi: "Ngingawuthokozela sthandwa sam." Nami kukhona umuntu thizeni owangibeka endaweni yami ngingazanga ukuthi kanti bese ngisukile. Sasingazani kahle, ebuza indawo thizeni edinga imininingwane. Kangisazi wathini, ngathi mina: "Cha akunjalo my angel." Wavele waphendula ngokuthi "Yeyi, angiyona i- angel yakho, ungalinge nje ungibize ngaleyo nto." Ngasala ngikhamisile-ke kodwa kangizange ngiyehle inqola ngoba namanje ngisakwenza kwazise kuvele kuziphumele.
Kangisayiphathi-ke eyokunqamulela amagama abantu, lapho-ke ngiyinkosi yakhona ngoba umuntu ugcina ebizwa ngengikushoyo ngimnqamulela. Ngino-skoni ogane ubhuti owethulwa ngelikaZodwa kodwa namuhla uwonke wonke sewumbiza ngoZoe owaqanjwa yimina. Kube ngabangani esahlangana nabo enyuvesi, bazethula ngelikaZakhona noKhethiwe namuhla nasemindenini yabo esengibuya kuyona babizwa ngoZah noKhethi, kuningi nje. Samkelo Ngidi-Dube, ERICHARDS BAY
Othisha kumele babe nendlela yokujezisa abafundi hhayi ngendlela ezobehlisa isithunzi. Ngasala ngikhexe umlomo kodwa angiyekile.