KUNOMTHELELA UKUNGABI KHONA KUKABABA ENGANENI
ZIBUKEKA ziya ngokwanda izinselelo ezibhekene nabazali mayelana nokukhuliswa kwezingane eNingizimu Afrika.
Sengathi kufika isikhathi lapho abazali abaningi bedideka ukuthi yiziphi izindlela ezizobasiza babhekane nalezi zinselelo zokukhulisa abantwana kulesi sikhathi sanamuhla. Kuningi okudala izingqinamba ekukhuliseni izingane zalesi sikhathi . Kuyaphawuleka ukuthi esikhathini samanje izingane zididwa wubuningi nokuvuleleka kwezinto ezizibukayo nezifundiswa ngazo komabonakude, emisakazweni, ezikoleni, emiphakathini nasezweni lonkana.
Kubukeka kukuningi manje okwenziwa udede - obekungenziwa phambilini - okudala mhlawumbe izingane zigcine sezikhungathekile, zizithole ziphakathi kwezinto mhlawumbe ezingaziqondi kumbe engekho ozozichazela mayelana nokuvuleleka kwempilo eziphila ngaphansi kwayo.
Ngicabanga ukuthi lokhu kuvuleleka kwezimo zempilo okufaka ulwazi lwesimumathalwazi ( computer), omakhalekhukhwini nendlela osekufundwa ngayo ezikoleni, kunawo umthelela wokuthi izingane zizithole zivuleleke ezintweni eziningi, ezinye zazo eziyindida noma ezindala kunemiqondo yazo. Ngokwemvelo nje, ingane inomqondo wokuthanda ukufunda ngokwenza nangokubona.
Kayifani nomuntu omdala, yona kayizwa kahle uma uzoyitshela kodwa ifunda kangcono uma izozifunela bese iyazenzela. Lokhu kakugcini ngezinto ezinhle, nalezi esingathandi abantwana basheshe bafinyelele kuzona bazifunda ngendlela efanayo. Ngicabanga ukuthi ukuvuleleka kwempilo nezinto ezenzeka empilweni yamanje - kuhlangene nendlela izingane ezifunda ngayo - kunomthelela ekubeni izingane zibe nengcindezi, zigcine zifuna ukwazi yonke into ngokuba ziyenze hhayi ngokuyitshelwa.
Uma uthi kuzona kakwenziwa okuthile, zibuza ukuthi ngobani okukanye “kungani kungafanele ngenze into ethile”. Le mibuzo-ke idinga umzali ozokwazi ukuthi naye avuleleke uma eyiphendula kodwa aqaphele ukuthi yisiphi isigaba sokukhula lo muntu akhuluma naye akusona - ulwazi amnika lona ngaleso sikhathi luyahambisana yini nesigaba sakhe.
Kakulula ukukwenza lokhu futhi kudinga isineke nobuciko obuthile ngoba umqondo wengane uyashesha futhi ingane kayeneliseki kalula uma uyinika izimpendulo ezingagculisi.
Izingane zamanje kakulula ukuziziba uma zinemibuzo ngoba ngeke ziyeke ukuyibuza ngenxa yokuthi uyayiziba. Uma uke wenza iphutha lokungalikhulumi iqiniso ekuqaleni, kuba nzima ukuthi usuzothini uma isibuye ikubuza futhi.
Kubalulekile ukuba abantwana bethu sibaphendule ngokwethembeka ngoba kabakhohlwa uma uke washo into kubo, bayayigcina bese kusasa uba ngumzali abangamethembi - uma ungabaphenduli ngeqiniso. Emindenini yethu thina ma-Afrika kuvamile ukuba sibe nezingane othola ukuthi zinezibongo ezingafani kodwa zibe zizalwa ngumzali oyedwa, nalokho zingakubuza izingane futhi zilindele ukuba ube neqiniso ezimpendulweni zakho njengomzali.
Kungabukeka kubanga amahloni ukuchaza into enjalo kodwa kubalulekile ukukusho ngendlela eyiyona, enikeza incazelo ezoyakha ingane. Kangikubukeli phansi ukuthi kunezinto okungafanele sizitshele izingane kodwa kumele sibe nendlela yokwenza lokho ukuze singazitholi kusasa sesingasazi ukuthi sithini uma sezizitholele lolo lwazi ebesingafisi ziluthole.
Kwesinye isikhathi izingane zikhula nentukuthelo esingayiboni thina sibadala mhlawumbe yokuthi kayimboni uyise uma ikhula futhi akekho ozimisele ngokuyichazela ukuthi washonaphi. Uma ibuza ngaye iphendulwa ngokunganaki noma kukhulunywe kabi ngoyise, ikhule inemibuzo engaphenduleki. Igcina inale ntukuthelo ezoyenza ikhule inolaka, igcine ingasalawuleki.
Ngingezwakali kabi sengathi ngithi abazali yibona abenza kube nzima noma kube yinselelo ukukhulisa ingane kodwa ngifisa ukuveza ukuthi kwesinye isikhathi kumele sizike, sijule sizame ukubheka umsuka wezinselelo esibhekene nazo ukuze sizame ukulungisa lapho kungalungiseka khona. Masibhukuleni singabazali sakhe isisekelo esinobuqotho ebantwaneni bethu ukuze sondle ubudlelwano bethu nabo.
Kusengalungiseka nina beSilo, inqobo nje uma sizimisele!! Makhosi Ndleleni (Bonakele) uMaZulu Zondo.Insika yaMathiyane. UThishanhloko waseMatatane Secondary School. mthiyanesgs@yahoo.com 082 752 7342
Kunezingane ezinezibongo ezingafani ezizalwa ngumzali oyedwa.