Uhlukanisa umndeni owombhoxo
ITheku lizohlafuna kahle ngonobhutshuzwayo neCurrie Cup
UHLUKANISA umndeni owamanqamu weCurrie Cup ozogijinywa yiSharks neWestern Province ngoMgqibelo ngo-16h00 eGrowthpoint Stadium, eThekwini.
ISharks icijwa nguRobert du Preez ogijinyelwa eqenjini lakhe ngamawele akhe uJean du Preez noDan. Ngakolunye uhlangothi, indodana endala yomqeqeshi weSharks ayiqamba ngaye, uRob- ert du Preez, igijima kwiWestern Province.
Lo mdlalo uzohlukanisa umndeni njengoba ubaba namadodana amabili bezobhekana neqembu eligijinyelwa yindodana endala okushiya unina walaba badlali kungacaci ukuthi uzoseka umyeni wakhe namawele kumbe uzohamba neWestern Province.
Nokho indodana endala, uRobert, ithe kayiboni ukuthi unina uzothwala kanzima kulo mdlalo izeseka ngokuthi iyazi ukuthi inhliziyo yakhe izokube ibafisela bonke impumelelo. Kulindeleke ukuba kusiphuke izidindi kulo mdlalo njengoba womabili la maqembu engagayelwa mphako.
La maqembu azoshukana ngesikhathi esicishe sifane neLamontville Golden Arrows ezokube ibhekene ngaso ne-Orlando Pirates koweTelkom Knockout ozoqala ngo-15h30 ePrincess Magogo Stadium, KwaMashu. Le midlalo izolanywa ngoweKaizer Chiefs ezogadulisana namaZulu FC koweTelkom ngo-20h15 eMoses Mabhida Stadium.
Ukuhlelwa kwemidlalo emithathu yezinga eliphezulu eThekwini ngosuku olulodwa kwenza bahleke bodwa osomabhizinisi bakuleli dolobha kusuka kwabezinto zokuthutha, abamahhotela, abadayisa ukudla nabahweba ngokuningi okwahlukene okuthandwa yizivakashi.