Babuyise umqeqeshi obanqobise iligi
Bahlose ukunyukela kwiNFD ngesizini ezayo
UPHILANI “S’lwane” Mkhize ukhuze ibuya kwiMilford FC egijima kwiSouth African Football Association (Safa) KwaZulu-Natal ABC Motsepe League elobizela ukunyukela kwiNational First Division (NFD) ngesizini ezayo.
ILANGA lihoshe ngemithombo yalo engashayi eceleni ukuthi le kilabhu eholwa nguDkt Xanti Pupuma isiqashe uS’lwane njengomqeqeshi omusha ukuvala isikhala esivuleke ngemuva kokugqabuka kwegoda phakathi kwayo noThami “TV” Ngubane obeyicija.
UMkhize ufike kule kilabhu noSiyabonga “George” Khanyile wodumo lokudlala kwiLamontville Golden Arrows ngesikhathi inyukela kwiPremiership okokuqala. Bazobuye basizwe nguNhlanhla Hlongwa noThulani “Tiger” Hlatshwayo oyisikhulu esiphezulu.
Kuthiwa uMkhize uqale ngokusemthethweni umsebenzi kwiMilford ngoMsombuluko ukulungiselela umdlalo weligi neGWP Friends ozokuba ngoMgqibelo ngo-15h00 eMhlathuze Sports Complex, eRichards Bay. UMkhize ubebambe elikhulu iqhaza ekulolongeni uThongathi FC lunyukela kwiNFD ngokuphela kwesizini edlule.
Lo mqeqeshi akamusha kwiMilford FC kwazise useke wenza umsebenzi ofanayo kule kilabhu nokho yahluleka ukunyukela kwiNFD isifikile emidlalweni yokuhlunga ebiseKimberley ngowezi-2015.
UMdu Zikhali oyimenenja yeMilford uvumile ukuthi sebeqashe uMkhize ngokugcwele kule kilabhu. Uthi banethemba lokuthi ezabo zizokwenza kahle kwazise bayawazi amagalelo akhe njengoba ebanqobise lesi sigaba ezingeni lesifundazwe ngowezi-2015.
Kuzo ezeMotsepe League, kuzosiphuka izidindi emdlalweni weDurban FC noMvoti FC ngoMgqibelo ngo-13h00 eKing Zwelithini Stadium, eMlazi. Kulo mdlalo kubukeka kuzoshuba kwazise womabili la makilabhu athishwa ngokudla ubhedu kulesi sigaba kanti ngeledlule abuye namaphuzu agcwele.
IDurban FC ibhudluze iSummerfield Dynamos ngo-4-0 kwathi uMvoti FC waphunyula ngembobo yenaliti udla iNatal United ngo-2-1.
Isiyonke imidlalo yeSafa KZN ABC Motsepe League engempelasonto imi kanje:NGOMGQIBELO Ugu Sport Complex: Happy Wanderers vs Natal United FC 12h00.
EKing Zwelithini: Durban FC vs Umvoti FC 13h00.
EDarnall Ground: KwaDukuza United vs Ses’khona 15h00. EMakhehleni: KwaMashu All Stars vs Edendale Juventus 15h00.
UMhlathuze Sports Complex: Milford FC vs GWP Friends 15h00. NGESONTO EKandahar Stadium: Ladysmith United FC vs Summerfield Dynamos 15h00.
EMbali Stage: Drakensburg FC vs Maritzburg City 15h00.