IPirates imincile ngabadlali abamqoka
I-Arrows iqine idolo ngerekhodi lokungehlulwa
UBAMBA uyayeka umqeqeshi we-Orlando Pirates njengoba kuvela ukuthi umincile ngabadlali bakhe abamqoka.
IBucs izobhekana neLamontville Golden Arrows koweTelkom Knockout ngoMgqibelo ngo-15h00 ePrincess Magogo Stadium, KwaMashu.
UMilutin “Micho” Sredojevic ocija iBucs kuvela ukuthi ubamba uyayeka njengoba uMthokozisi Dube odlala emuva, uMusa Nyatama oyibamba esiswini noThamsanqa “Gandaganda” Gabuza ongumgadli benokuthinteka.
Kuthiwa sekulindwe ukuba bahlolwe okokugcina ngodokotela kusa- sa ngoLwesihlanu ngaphambi kokuba kunqunywe ukuthi bazodlala yini.
“Uma uya emdlalweni omkhulu njengalona udinga bonke abadlali bakho abawumgogodla. Ngimincile nje ukuthi kufike usuku lomdlalo laba badlali sebesesimweni esigculisayo. Amalungiselelo ahamba kahle, siwulindele lo mdlalo we-Arrows,” kusho uSredojevic.
UClinton Larsen ocija i-Arrows, uthi izinto zihamba kahle kwezakhe futhi akanalo uvalo ngalo mdlalo wePirates.
“Sesigijime imidlalo eyisi-9 singehlulwa, lokho kwenza abafana bami bangabi nalo uvalo lokubhekana nanoma yiyiphi ikilabhu abaqhathwe nayo. Nalo mdlalo wePirates siwulungiselele ngendlela efanele, wonke umuntu uwulangazelele.
Engikuqaphele ngayo wukuthi ihluke kakhulu kunangesizini eyedlule, iyashesha uma ihlasela kanti ngeyedlule ibithatha isikhathi sayo ukuhlasela.
“Kodwa-ke izofika siyihlomele iPirates lokho kangikungabazi.
Okuhle nje wukuthi kungase kubuye uNduduzo Sibiya noTrevor Mathiane abebelimele,” kusho uLarsen.