USELUBALUBELA UKUYA E-EUROPE UMASULUKE
ULUBALUBELA ukuyovimba e-Europe unozinti waseNingizimu Afrika obemele i-Afrika yonke emcimbini wezindondo weFederation of International Football Association (Fifa) engamele unobhutshuzwayo umhlaba wonke.
U-Oscarine Masuluke ( osesithombeni) ovimbela iBaroka FC uhlulwe nguOlivier Giroud we-Arsenal emklomelweni weFifa wegoli lonyaka obizwa ngePuskas emcimbini obungoMsombuluko kusihlwa eLondon, e-England. Ubekhethwe kwabathathu abashaye amagoli amahle emhlabeni. UMasuluke ubeqala ukuphuma ngaphandle kwelakuleli.
Ukuphuma kwakhe okokuqala kumshiye nesithombe azwakalise ukuthi ngeke aphinde asikhohlwe empilweni yakhe njengoba ebesegunjini elilodwa noCristiano “CR7” Ronaldo wasePortugal odlala kwiReal Madrid yaseSpain oqokwe njengomdlali ovelele emhlabeni kuwo lo mcimbi, uLionel Messi weBarcelona odabuka e-Argentina, uNeymar Jnr waseBrazil ogijima kwiPSG yaseFrance.
Cishe kulo mcimbi bekukhona lonke uhlobo lwabadlali abahlonishwayo emhlabeni nasebathatha umhlalaphansi kubalwa uDiego Maradona wase-Argentina. UMasuluke uthi kushwaqe izinwele engena egunjini obekwenzelwe kulona lo mcimbi obuseqophelweni eliphezulu eLondon.
“Engikubone kulo mcimbi kungishiye nginomuzwa engingakwazi ukuwuchaza. Bekuvele kushwaqe izinwele, kuhlasimule umzimba uma ngihlangana nezihlabani engingakaze ngizitshele ukuthi ngiyoke ngizibone ngamehlo enyama. Okungichazile wukuthi kabazitsheli, indlela abangamukele ngayo ingenze ngakuhalela ukuyodlala e-Europe.
"Njengoba ngibuyela emsebenzini kwiBaroka nje ngiyolwela ijezi lami ngoba ngifuna ukukulwela ukuyodlala e-Europe,” kusho uMasuluke.
Leli phephandaba lithole ukuthi lo mdlali usezakhele ugazi emhlabeni kangangoba kunamakilabhu akhona e-Europe athembise ukumbheka.
Kuthiwa achazwa nayindlela amude ngayo.