BASOLA UMNYANGO NGOKUFA KUKATHISHA
Umphakathi uvale thaqa isikole
KUSOLWA uMnyango wezeMfundo KwaZulu-Natal ngokudembesela ekuxazululeni udaba lukathishanhloko wasePetros Jozana Secondary School, eMzimkhulu, eningizimu yeKwaZulu-Natal, ogcine eziphose emfuleni udla izindwani emasontweni amabili edlule.
Umphakathi wakule ndawo, okubikwa ukuthi bewudinwe ugane unwabu ngoMsombuluko, ukhethe ukusivala thaqa lesi sikole obekuphethe kusona uMnu Bhekithemba Ngubo (39), ofihlwe ngempelasonto edlule emuva kokutholakala kwesidumbu sakhe sesonakele emuva kwezinsuku eziyisihlanu engatholakali.
ILANGA lincinzwe indlebe yimithombo yalo engaphakathi kulesi sikole ngoMsombuluko ekuseni njengoba othisha nabafundi bengakwazanga ukungena ngokukhululeka kwazise amalunga omphakathi abevale ngezingidi nangamaketango ethi kakudluli muntu.
Kuthiwa umphakathi ucasulwe yisenzo sothishelakazi ababili okuthiwa ububamemeza ngamagama uthi kawubafuni nokubabona emagcekeni alesi sikole ngoba usola ukuthi yibona ababe nesandla esikhulu ekufeni kukaMnu Ngubo azibulale.
Lo mphakathi kuthiwa uphinde wakhala nangomnyango uthi nawo usiyekelele kakhulu isimo sakulesi sikole.
“Kuliqiniso elingephikwe ukuthi umnyango bewazi ukuthi uMnu Ngubo akahleli kahle lapha njengoba nabahloli beke bafika kunophenyo obelwenziwa. Nakhona kutholakale ukuthi uMnu Ngubo ubebhecwa ngobende inyama engayidlanga kodwa umnyango wangathatha izinqumo ezeseka yena,” kusho umthombo.
Uthi kulesi sikole bekuhlale kunezinxushunxushu futhi kwaziwa ukuthi abaphembi balowo mlilo yila mathishelakazi amabili njengoba kuthiwa omunye wabo ubegaqele isikhundla sikaMnu Ngubo.
ILANGA lithole ukuthi kuke kwaba nomzali ofake isikhalo emnyangweni wezemfundo ngokungagculiseki kwabazali ngoMnu Ngubo.
“Lowo mzali ubehlohlwa yilabo thisha ababili, lokho nje yinto eyaziwayo. Lo mzali ukhale ngokuthi uMnu Ngubo ubabiza ngamaqaba athi kabafundile, okuyinto ebingelo- na nhlobo iqiniso,” kusho lo mthombo.
Kuthiwa kuke kwaba nesimo lapho umnyango wezemfundo utshele uMnu Ngubo ukuba axolise kuleli lunga lomphakathi - kuthiwa uvele wadideka ukuthi kungani kufanele axolise.
“UMnu Ngubo bekungumfana ozilungele, ozithulelayo. Ukhulele lapha endaweni kanti ubenothando oluyisimanga ngalesi sikole futhi engumuntu ohlakaniphile. Ufike kulesi sikole wabonakala ukuthi ukhuthele nokuthi unothando lwezingane zesikole.
“Ungene esikhundleni sokuba yinhloko yezifundo kwathi ngoba uthishanhloko wakulesi sikole ubesekhulile waphakamisa igama lakhe uMnu Ngubo ngesikhathi esethatha umhlalaphansi. Ukuba nyamanambana kwakhe kuqale lapho-ke ngoba kukhona abebengahambisani nokubekwa kwakhe,” kusho lo mthombo.
Leli phephandaba lithole kwabebesondelene noMnu Ngubo ukuthi ukungahambi kahle kwezinto esikoleni nokuhlaliswa lubhojozi yilabo thishelakazi bese kumphazamise nasemphefumulweni.
Ilunga lomphakathi elikhulume naleli phephandaba - ngombandela wokuthi lingadalulwa - lithi le nto beyaziwa nje endaweni nabazali bezingane zesikole bazi ukuthi labo thishela kabamfuni uMnu Ngubo futhi bebengamhloniphi.
Kuthiwa umphakathi ubufunga ugomela uthi uzosivala lesi sikole uma kuwukuthi labo thishelakazi kabahambi.
ILANGA litholile ukuthi ngawo uMsombuluko kudingeke ukuba umnyango wezemfundo ungenelele uyolamula isimo. Ngesonto uMnu Ngubo azibulale ngalo, kuthiwa uqale wathi uyesaba kanti kuthiwa nabo labo thishelakazi ubesesho ukuthi uyabesaba.
“Bebethi uma beqhamuka athule angafuni nokukhuluma ngoba ethi uyabesaba. Bakhona othisha abebesondelene naye abazamile ukukhuluma naye ngoba ubebonakala ukuthi ulimele kakhulu emphefumulweni.
“Ubesejwayele ukusho ukuthi sizomeswela kodwa singaqondi ukuthi usho ukuthini,” kusho omunye umthombo obewusondelene kakhulu nomufi.
Kuthiwa ngoLwesine aziphonse ngalo emfuleni, uqale wavalelisa kozakwabo abebemeseka, wabonga.
“Uthe uyabonga ngokuthi besimeseka kukhona konke abekwenza washo nokuthi isidumbu sakhe sizotholakala kuphi. Kukhona uthishanhlobo ophuthumile wayombheka wamfica ephethe isibhamu. Ukwazile ukumphuca sona wathi esafulathela nje eyosifihla emotweni, wavele waziphonsa emfuleni,” kusho umthombo.
Ilunga lomndeni kaMnu Ngubo, elicele ukuba igama lalo ligodlwe, lithe nabo njengomndeni basola kakhulu umnyango wezemfundo ngokumyekelela nangokudembesela noma sekuvezwa ukuthi akahleli kahle ngenxa yalabo thisha ababili abebemhlukumeza.
Ngokuthola kweLANGA, kunelunga lesigungu esilawula isikole ebelihlangane nalabo thishelakazi ukuhlukumeza lo thishanhloko.
Leli phephandaba lithole nokuthi kunezinsolo zokuthi labo thishelakazi bebemsebenzisela imithi uMnu Ngubo njengoba kuthiwa ubethi kuba buhlungu izinqe uma ehlala esihlalweni sakhe emsebenzini.
Okhulumela uMnyango wezeMfundo kwaZul-Natal, uMnu Kwazi Mthethwa, uthe njengomnyango bazwelana kakhulu nomndeni nesifunda okwenzeke kusona lesi sigameko.
“Esizokwenza wukuphenya kabanzi ngalokhu okuthiwa kwenzekile ngaphambi kokuba sikhulume ngakho ngoba uma kunomuntu oze washona, kumele sikulandelelele lokho. Njengamanje sicela umphakathi wehlise imimoya, usinike ithuba lokukhuluma nezikhulu zethu sithole ukuthi kwenzekeni,” kusho yena.
nonhlakaniphos@ilanganews.co.za