OWE-CHIEFS USELALA OBENYONI NGOSUTHU
IBhele lifisa zimbozwe iziMpofana eThekwini
ULALA obenyoni umqeqeshi weKaizer Chiefs ngomdlalo namaZulu FC wesigaba sikaLast 16 kwiTelkom Knockout ozokuba ngoMgqibelo ngo-20h15 eMoses Mabhida Stadium, eThekwini. Nakuba iChiefs kuyiyona etonyulwe ekhaya kodwa inqume ukuletha lo mdlalo eThekwini. ILANGA lihoshe ngemithombo yalo ukuthi nakuba uSteve “Mphathi” Komphela ololonga iChiefs enze kahle emidlalweni emibili edlule lapho ehlule khona iMamelodi Sundowns ngo-2-1, wadlala ngokulingana nomkhaya i-Orlando Pirates ngo-0-0 kodwa abalandeli bayamsongela ngomdlalo woSuthu. Kuthiwa bamuthumelela imiqhafazo emusongelayo uma kuwukuthi akawunqobi lo mdlalo. Kuthiwa bathi kulokhu uma nje bengahlulwa bazokuqinisekisa ukuthi badala umonakalo ukuze iChiefs izongena ezindlekweni njengoba ingafuni ukukhokhela uKomphela bese imxosha. Kuzokhumbuleka ukuthi ngesikhathi iChiefs ihlulwa yiBaroka FC ngo-2-1 koweligi kuyona le nkundla emasontweni ambalwa edlule abalandeli bavuke umbhejazane bethi uKomphela makahambe. Baze bazama ukushisa inkundla abanye benompela endaweni yezicukuthwane befuna ukuzifikela mathupha kuBobby “Bobsteak” Motaung oyiMenenjajikelele yale kilabhu bethi nguyena ongafuni ukuxosha uKomphela.
UKomphela kabamufuni abalandeli nje, yingoba selokhu efike kwiChiefs kumasizini amabili edlule akakanqobi lutho.
Lena yisizini yakhe yokugcina kanti kuyona usesalelwe yiTelkom Knockout, yiNedbank Cup neligi ukujabulisa abalandeli bale kilabhu ngenkomishi.
UKomphela akathandanga ukuphawula ngolwezinsongo ezeseka ngokuthi uzama ngazo zonke izindlela ukubuyisa isithunzi sale kilabhu.
“Ngiyazi ukuthi kule kilabhu into efunekayo yizinkomishi. Uma ungazitholi uba senkingeni. Nokhoke kasizukutatazela, sizobhekana nomdlalo ngamunye. Umdlalo wamaZulu ngeke ube lula neze ngoba nawo akhombisa ukuvuka emaqandeni.
"Ukuhlula kwawo iSundowns kuyizinkomba zokuthi ayingozi uma uzowathatha kancane. Kodwa-ke siyakwazi okufanele sikwenze noma yikanjani sizokwenza ngakho konke okusemandleni ukuwunqoba lo mdlalo,” kusho uKomphela.
USiyabonga “Bhele” Nomvethe ongumgadli woSuthu osefomini kulezi zinsuku, uthi sibajabulisile isinqumo seChiefs sokuletha lo mdlalo eMoses Mabhida.
“Sijabule kabi ngesikhathi bememezela ukuthi lo mdlalo bawuletha eMoses Mabhida. Empeleni sidlalela ekhaya ngoba phela iMabhida siyazi njengoba sizazi. Yikho lokho okusijabulisile. Kodwa-ke umdlalo ngeke uze ube lula. Esikucelayo nje wukuthi abalandeli bethu baphume ngobuningi babo ukuzoseseka ngoba sizobadinga kulo mdlalo. Siyazi ukuthi iChiefs inabalandeli abaningi kulesi sifundazwe kodwa sicela abantu bakhombise ukuthi yikilabhu yasekhaya lena bayeseke,” kusho uNomvethe obheke ukubhakuzisa inethi ku-Itumeleng Khune ongunozinti wokuqina weChiefs neBafana Bafana.
Imidlalo yeTelkom Knockout isiyonke ngale mpelasonto iqhathwe kanje:KUSASA NGOLWESIHLANU EHarry Gwala Stadium: Maritzburg United vs Platinum Stars 20h00. NGOMGQIBELO E-Old Peter Mokaba: Polokwane City vs Ajax Cape Town 15h30.
EPrincess Magogo: Golden Arrows vs Orlando Pirates 15h30.
EDr Petros Molemela: Bloemfontein Celtic vs SuperSport United 18h00.
EMoses Mabhida Stadium: Kaizer Chiefs vs AmaZulu FC 20h15.
EBidvest Stadium: Bidvest Wits vs Free State Stars 20h15. NGESONTO EPeter Mokaba: Baroka FC vs Cape Town City FC 15h30.
ESisa Dukashe: Chippa United vs Mamelodi Sundowns 15h30.