IKHEMPU KAGONYA IPHOQE UMQHATHI NGO-TYCOON
IKHEMPU kaSiboniso “Tiger” Gonya iphoqe uFrank Warren ongumqhathi wezimpi ukuphula inkontileka ngesibalo sabantu abazophelezela leli bhokisa elizokulwa noZolani “Last Born” Tete empini yeWorld Boxing Organisation (WBO) Bantamweight mhla zili-18 kuLwezi (November) eBelfast, eNorthern Ireland.
UWarren uthumelele ikhempu kaGonya inkontileka ebikubeka kucace ukuthi uzohambisa abantu abane ekhempini kaGonya. Ubezeseka ngokuthi nguyena ozofunela uGonya ibhokisa azongcweka nalo phesheya kwezilwandle ngaphambi kwempi. Ikhempu kaGonya ishaye phansi ngonyawo izeseka ngokuthi ngeke angcweke nomuntu angamazi.
Lokhu kuphoqe uWarren ukufaka u-Innocent “Tycoon” Mantengu ohlwini lwabazophelezela uGonya.
UMantengu noGonya bahlale bengcweka futhi bangabangani abakhulu njengoba bobabili be- dabuka eMtubatuba enyakathompumalanga yeKwaZulu-Natal.
UTete ngowaseMdantsane, eMonti, e-Eastern Cape, kanti uvundululwe nguMzimase Mnguni onomlando omude esibhakeleni sakuleli.
UGonya uzohamba noThulani “Nkunzi” Magudulela ohlela izimpi zakhe, uZwi Magudulela benoSizwe Mthembu abangabaqeqeshi noMantengu.
UGonya kade eseGauteng eyongcweka namabhokisa alwa ngendlela efanayo noTete. UNkunzi utshele leli phephandaba ukuthi amalungiselelo asahamba kahle kakhulu. Uthi sebewathumelile kuWarren ama- video ezimpi zokungcweka zikaGonya okuyinto eyimpoqo ukuba yenziwe.
UTete nguyena oqoke uGonya ukuvikela kuyena leli bhande. UGonya ukleliswe endaweni yesithathu kwabagaqele leli bhande. Ukuqoka kukaTete uGonya kuqinisekisa ukuthi leli bhande lizoqhubeka nokuphathwa eNingizimu Afrika.