I-PIRATES NE-CHIEFS BAGWEMENE KWI-TKO

ZIGWEMENE izinkunzi zaseSoweto kumaquarter final eTelkom Knockout azogijinywa ngempelasonto esiya kuyona kusuka ngoLwesihlanu lomhla zintathu kuya ngeSonto lomhla ziyisi-5 kuLwezi (November) ezinkundleni ezahlukene.

I-Orlando Pirates izokwamukela iPolokwane City eSoweto kuthi iKaizer Chiefs ilibangise e-Eastern Cape ukuyodudulana neChippa United. IPlatinum Stars izoshukana neBloemfontein Celtic eNorth West kuthi iBidvest Wits ikhiphane inkani neBaroka FC eGauteng.

IPirates ifinyelele kulesi sigaba ngokuguqisa iLamontville Golden Arrows ngo-1-0 ngoMgqibelo KwaMashu, kwathi iPolokwane yahlula ngamaphenathi i-Ajax Cape Town kuba ngu-4-3.

IChiefs ishaye AmaZulu FC ngo-3-0 eMoses Mabhida Stadium, kwathi iChippa yawashisa ijezi iMamelodi Sundowns kuba ngu-1-0 izolo ngeSonto eBuffalo City Stadium.

IPlatinum Stars iphoxe iMaritzburg United enkundleni yayo iHarry Gwala iyihlula ngo-3-1 wamaphenathi ngoLwesihlanu ebusuku kanti iCeltic ikhiphe iSuperSport United ngo-5-4 wamaphenathi emdlalweni obuphele kungu-2-2 ngoMgqibelo eFree State.

IWits iwashise ijezi iFree State Stars kuba ngu-4-2 kwathi iBaroka yadla iCape Town City ngo-1-0 izolo ngeSonto eLimpopo.

Selulonke uhlu lwemidlalo yama-quarter final eTKO lumi kanje, ikilabhu esekuqaleni idlalela ekhaya: Pirates vs Polokwane; Chippa vs Chiefs; Platinum vs Celtic; Bidvest vs Baroka.

ISITHOMBE NGABE: GALLO IMAGES UBEBASHIYA bebhuquza kanje abadlali bamaZulu FC uPule Ekstein weKaizer Chiefs kodwa ehluleka uma sekumele ibhola aliqabulise inethi emdlalweni weTelkom Knockout, ngoMgqibelo ebusuku eMoses Mabhida.