OWOSUTHU UCASULWA YITHEKU NE-CHIEFS
UMQEQESHI wamaZulu FC uCavin Johnson ( osesithombeni) ufuna ukuwalungisa ngokushesha amaphutha aholele ekutheni le kilabhu iphoxe abalandeli bayo ikhishwa ekuseni kwiTelkom Knockout.
USuthu luzobhekana neBaroka FC kowe-Absa Premiership ngoLwesithathu ngo-19h30 eKing Zwelithini Stadium, eMlazi. Le kilabhu isazikhotha amanxeba okukhishwa yiKaizer Chiefs ngo-3-0 ovuthayo kwiTelkom Knockout ngoMgqibelo ebusuku eMoses Mabhida Stadium, eThekwini.
UJohnson uthe: “Okufanele sikwenze nje thina manje wukuthi silungise iphutha (lokukhishwa kwiTKO) ngokunqoba umdlalo wethu weligi neBaroka FC. Lo mdlalo ngeke ube lula kodwa kasikwazi ukuphoxa kuwona, noma kanjani kufanele siwaqoqe womathathu amaphuzu.”
Nakuba uJohnson efuna ukuwunqoba umdlalo weBaroka kodwa okucacile ngoSuthu wukuthi ludinga izitobha ezimbili ezinesipiliyoni. Kulo mdlalo weChiefs ububona ukuthi bezibamba ziyeka izitobha zalo ngenxa yokuthi bezisontekile kwazise bezidlala ezindaweni ezingazijwayele.
Cishe lonke udonga loSuthu belwakhiwe ngabadlali abebebekwe ezindaweni abangazijwayele. AmaZulu ayingozi impela uma eya phambili, inkinga nje yisemuva kanti yilapho okumqoka ukuqinisekisa ukuthi uvalile, kakungeni lutho. Nasepalini kuzofanele abhekisise ngoba nakhona agabe ngonozinti abangenayo imidlalo eminingi kulesi sigaba.
UJohnson uthi emdlalweni weChiefs babulawe nguSiphiwe “Shabba” Tshabalala.
“Isizathu esenze sahlulwa yiChiefs nguShabba. Besihlele ukuthi simuvale anganyakazi kodwa sangakwenza lokho. Kunento abantu abangayazi ngoShabba, uyingozi kakhulu uma engaliphethe ibhola kunoma eliphethe. Kunemigijimo ayenza emuva kwezitobha ngobuhlakani okwenza iChiefs ibe yingozi. U-Itumeleng Khune uma ephethe ibhola usuke esazi kahle ukuthi uShabba ungakuphi bese emnika ibhola. Negoli alishayile izitobha zami kazimbonanga ukuthi uqhamukephi.
“Kodwa-ke abantu okufanele bakuqonde wukuthi AmaZulu aneminyaka cishe emine engadlali kulo mqhudelwano, besilindele vele ukuthi kuzokuba nzima. Into emqoka kithina njengamanje wukuqinisekisa ukuthi le kilabhu iyahlala esigabeni esiphezulu kayigencwa yizembe ngokuqoqa amaphuzu emidlalweni yeligi kusuka ngoweBaroka,” kusho uJohnson.
WINA! WINA! WINA!
ILANGA namaZulu FC baphisana ngamathikithi ahamba ngamabili kubafundi abali-15 abanenhlanhla okubuka uSuthu lushukana neBaroka FC kowe-Absa Premiership ngoLwesithathu ngo-19h30 eKing Zwelithini Stadium, eMlazi. Okumele ukwenze ukuzibeka ethubeni wukuthumela ngomqhafazo igama elithi: HEBE enombolweni ethi: 33818. Umncintiswano uvalwa kusasa ngoLwesibili ngo-14h00 kanti abawinile bazothintwa ngocingo. I-sms ibiza uR1,50.