VUKA UZITHINTITHE:
KASIKHO isizathu esingadala ukuba ufishi udube amanzi, ngisho ungaphakama kanjani kodwa ngeke uwaphakamele amanzi.
Kangicabangi ukuthi isihlahla singake sibe nenkani sithi kasiyidingi inhlabathi empilweni yaso. Kabukho ubulima obungafana nokuthi izinkanyezi zithi kazisidingi isibhakabhaka empilweni yazo. Ngumuntu kuphela ophakama aze aphakamele ngisho umenzi wakhe.
Indlela umuntu angamfuni ngayo uNkulunkulu, uzozwa omunye uma umbuza nje ukuthi kawukholwa ngani noma kawuyi ngani enkonzweni, athi: “Le nto yokukholwa noma le nto kaNkulunkulu kayikho.”
Ngisabuza namanje ukuthi umuntu wenziwa yini ukuba uma nje eke wagilwa ngamakholwa bese eduba uNkulunkulu. Mangakanani amantombazane nabafana abakugila emjolweni kodwa namanje usaqhubeka uyajola? Kawukaze uthi uma ubhedelwe emjolweni bese uwungabaza uthi le nto yomjolo kayikho.
Zingakanani izimoto ohlale uzibona zigingqika kodwa namamje imoto usayigibela? Kawuthi uma ubona imoto igingqikile bese uthi le nto yemoto kayikho. Ngisaphinda futhi, yini le engaka uNkulunkulu ayenza kubantu ukuthi uma kubheda ikholwa bese sithi le nto yokukholwa kayikho. Umuzwa omunye uma engasayi enkonzweni ethi singakholwa kanjani uma osibanibani besenza kanje.
Yini le eyafakwa ekhanda lomuntu ukuba angawungabazi umjolo noma egilwa, angayingabazi imoto noma ngabe yake yamgingqa noma yamlimaza kodwa la kuNkulunkulu bakugila kanye nje uyaduba. Singakhohlisana nje singabantu ngenxa yemfundo, wukuphakama nemali esinayo.
Ngisho ungathini kanginandaba kodwa iqiniso limile nje lithi ufishi udinga amanzi, isihlahla sidinga inhlabathi, umuntu udinga uMdali wakhe. Singakhohlwa-ke njalo wukuthi amanzi ayakwazi ukuziphilela nje noma ufishi ungekho kodwa ufishi ngeke uphile wona engekho .
Uma ufishi usuka emanzini usuke usuya ethinini, sekuphelile ngawo usuyadliwa. Inhlabathi ingaphila isihlahla singekho kodwa isihlahla ngeke siphile uma inhlabathi ingekho. Ukuba izihlahla ziyakhuluma, beziyoku- tshela ukuthi cha “uma sebesisuse enhlabathini basuke sebeyosishisa noma sebeyokwenza izinto zabo ngathi, thina sisuke sesazi ukuthi ngokusuka nje enhlabathini sekuphelile ngathi”.
Noma abantu bangaphathwa ngubani - kakunandaba ukuthi inkosi ngubani, umengameli ngubani uma nje bexabene noMdali akekho oyokwazi ukubaphatha. Isizwe esixabene noMdali size sife sijaha utalagu, sifuna ukulubamba. Buza bonke abantu abashadile futhi uma uthanda ubuze bonke abanemali nezimoto ezibizayo ukuthi zonke lezi zinto ziyakudala yini ukuthula emoyeni wabo.
Ngisho ngoba ufishi udinga amanzi, isihlahla sidinga inhlabathi, masiyeke ukuphakama umuntu azihlole azibuze futhi ukuthi ngiyamhlonipha yini uMdali. Kumele sikhale siyisizwe uma kwanda abaholi, izifundiswa nezingane ezingamesabi uNkulunkulu. Ungamethembi umuntu ongamhloniphi, ongamesabi uNkulunkulu, ngisho angaba nemali engakanani, into nje engenaNkulunkulu iyokugila kusasa umelwe wumqondo.
UMfu Zondo ibandla lakhe eliseJewish Hall, eNorth Beach maqondana nePavillion Hotel lingena ngehora le-11h00 njalo ngeSonto. Ungaxhumana naye kwethi: 078 419 1024; Ungamshiyela nomyalezo kuFacebook: Sthembiso Zondo Fan Page noma kuWhatsApp: 082 070 8034
Kubafundi beLANGA, siyafisa ukuniphendula nonke, ucingo noma inombolo iyodwa ngakho kakulula ukunisiza nonke. Uma ufona uyizwa ikhala, nge-sinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nase-mkhulekweni.
UPastor Sthembiso Zondo ngumeluleki nomethuli wezinkulumo ezakhayo. Uzobe ephendula imibuzo yabafundi ngezinkinga zempilo nezothando kwiLANGA LangeSonto.