Omunye umsindo ngeSAB League
ISafa seyiqoke ozodidiyela lesi sigaba eKZN
IMPIKISWANO ngokuqokwa kukaKwenzakwakhe Ngwenya esikhundleni sokwengamela zonke izinhlelo zeSAB League kwiSouth African Football Association (Safa) eThekwini Region.
Amakilabhu eSAB League esifundazweni abenikezwa amajezi esizini entsha ngoLwesibili eSpringfield, eThekwini. UNgwenya uthi uqokwe nguDennis Mumble oyisikhulu esiphezulu seSafa ukwengamela wonke amaligi eSafa eThekwini. Lokhu kulandela ukuthi lesi sifunda sikhiphe amakilabhu amabili ukuhambela imidlalo yokuhlungela ukungena kwiSafa KwaZulu-Natal ABC Motsepe League.
Kumanje kawaphelele amakilabhu eMotsepe esifundazweni ngenxa yokuthi kayiphothulwanga imidlalo yokuhlunga yeSAB ngenxa yombango wamakilabhu aseThekwini. La makilabhu aqhamuka ezinhlakeni ezibanga amandla okuhola lesi sifunda okungolwaseCurries Fountain nolwaseHoy Park.
UNgwenya uthi ukuqokwa kwakhe kuyindlela ehlelekile yokuqinisekisa ukuthi izingane kaziphazanyiswa ukudlala ngenxa yemibango yabantu abadala. Uthi ngeke agxambukele ezinkingeni zeTheku, kodwa uzosingatha uku- dlalwa kwebhola.
U-Eric Smith wohlangothi lwaseHoy Park ebuzwa ngokuqokwa kukaNgwenya, uthe: “Sizwa emoyeni ukuthi kujutshwe uNgwenya. Thina sizokube sesenzani uma isifunda sethu sesiphethwe nguyena? Ziningi izinkinga okumele abhekane nazo eMkhanyakude. Thina sizoqhubeka nebesivele sikwenza njengobuholi. Kayikho indoda eyodwa okumele iphathe izifunda ezimbili.”
UZama Buthelezi onguNobhala wohlangothi lwaseCurries Fountain, uthe bakwamukela ngezandla ezimhlophe ukulethwa kukaNgwenya eThekwini.
“Thina sijabule ngoba kuhlengwa ibhola. Kakumele izinkinga zepolitiki yebhola zikapakele ezinganeni. Izingane kumele zidlale ibhola thina sesingakubanga esikubangayo. Sizobambisana kakhulu naye ngoba siyabona ukuthi iSAB League inezinkinga. Ngeke sisaba namakilabhu amabili amela iTheku okuyinto edunga imidlalo yokuhlunga,” kusho uButhelezi.