USEBUYA NGOKUGCWELE U-3 SECOND ESIBHAKELENI
USEBUYELE ngokugcwele esibhakeleni uThulani “3 Second” Nkwanyana osanda kusungula i-3 Second Boxing Promotions.
UNkwanyana uzobambisana neJ4J Foundation kaJacob Mnisi ukuhlela izimpi ngasekupheleni kukaLwezi (November) eMpangeni. UMnisi uyinjinga edumile kuleli kanti uNkwanyana ungumelaphi wendabuko. Bobabili bebengamabhokisa ngaphansi kukaNorman Hlabane wodumo lokucija uDingaan “The Rose of Soweto” Thobela.
UNkwanyana uthi lo mqhudelwano uyisiqalo sezimpi eziningi azozihlela eMpangeni.
“Ngicabanga ukuthi ukubuya kwami kulo mdlalo kuzokwenza umehluko. Ngifuna ukuqhubeka nohlelo ebengilwenza lokuvundulula amabhokisa bese ngiwanika uThulani Magudulela weLudonga Promotions. Ngijabula kakhulu ngoba ukusebenzisana kwethu kuthela izithelo.
“Kumanje uSiboniso Gonya uyolwela ibhande lomhlaba noZolani Tete e-United Kingdom. Ukuvelela kukaGonya kuwumphumela wobudlelwano obuhle enginabo noMagudulela.
Ngifuna ukukhiqiza abanye oGonya ngoba sekuyacaca ukuthi kuningi okuhle esingakuzuza nxa sibambisene,” kusho uNkwanyana obeyingxenye yomqhudelwano obungeledlule e-Olive Convention Centre, eThekwini.
Lezi zimpi ubezihlele ngokubambisana noZandile Malinga, uScelo Mzobe, uNomvelo Magcaba noMagudulela. Lo mqhudelwano usungulwe wumNyango WezeMidlalo wesifundazwe oholwa nguBongi Sithole-Moloi onguNgqongqoshe.
UNkwanyana uthi ufuna ukuthi umqhudelwano wakhe udidiyele amabhokisa ezinhlanga ezahlukene.