Banyundela elakuleli kwabombhoxo womhlaba
Bathi iNdebe yoMhlaba kakumele idlalelwe ezweni elibulala abangama-52 ngosuku
IZIMBANGI zinyundela iNingizimu Afrika ukuba ingalinikwa igunya lokusingatha umqhudelwano weNdebe yoMhlaba webhola lombhoxo ozogijinywa ngonyaka wezi-2023.
IWorld Rugby Council izosithatha ngoLwesithathu eLondon, e-England, isinqumo esibhekwe ngabomvu sokuthi yiliphi izwe elizothola igunya lokusingatha lo mqhudelwano phakathi kwelakuleli, yiFrance ne-Ireland.
Ngeledlule ibhodi yeRugby World Cup izwakalise ukuthi elakuleli kumele linikwe igunya lokusingatha lo mqhudelwano emuva kokuthola amaphuzu amaningi kunezimbangi ngomkhankaso walo. Umkhankaso wakuleli unikwe u-78.97, owaseFrance kwaba u-75.88 i-Ireland yathola u-72.25.
I-Ireland neFrance bakhala ngokuthi umkhankaso wakuleli kawukwazi ukubedlula kwazise ezokuphepha kaziqinile kuleli njengoba abantu kuleli bebulawa okwezimpukane imihla namalanga. La mazwe akhala nangokugqoza kwezibukeli ezinkundleni emidlalweni emqoka egijinyelwa kuleli.
Nokho uSihlalo weWorld Rugby, uBill Beaumont, uthi isikhathi sokuqhamuka nezikhalo zalolu hlobo zala mazwe kudala savalwa.
Ingxenyana yencwadi yesikhulu esiphezulu se-Irish Rugby Football Union (IRFU), uPhilip Browne, yokukhononda esikhulwini esiphezulu seWorld Rugby, uBrett Gosper, ithi muva nje kube nemidlalo emqoka kuleli ebigqoza izethameli okungakhulunywanga ngakho kanjalo nezokuphe- pha akhala ngokuthi kakubhekisiswanga ngokujulile kuwona wonke amazwe akhankasayo.
UBernard Laporte, onguMengameli weFrench Rugby Federation (FFR), ubhodle umlilo ngokubekwa endaweni yesibili komkhankaso wabo, ezeseka ngokuthi bazobhalela uBeaumont benxusa ukuba kwenziwe ubulungiswa ngaphambi kokuba kuvotwe ngalokho abakubuka njengokwenzelwa phansi kwazise uthi banezinga eliphezulu lezinkundla namahhotela.
“Kwezokuphepha sinikwe ama- phuzu alinganayo neNingizimu Afrika yize kubulawa abantu abangama-52 ngosuku kuleliya lizwe (kuleli). Wukuhlanya lokho,” kusho uLaporte.
Nokho iWorld Rugby igcizelele ukuthi seyikwenze konke ukubhekana nazo zonke izikhalo, yacacisa lapho bekukhona ukudideka khona emazweni afake izicelo zokusingatha le midlalo.
Le nhlangano ithi konke kwenzeke obala, hhayi ngaphansi kwetafula.
INingizimu Afrika iyisingathe ngempumelelo le midlalo ngowe1995 kwathi iFrance yayisingatha ngowezi-2007 kanti i-Ireland ifuna ukuzisingathela ngokwayo okokuqala ngqa.
Kuzo ezebhola lombhoxo, AmaBhokobhoko athelwe ngehlazo yi-Ireland kuba ngu-38-3 ochungechungeni lwemidlalo yokuphela konyaka ngoMgqibelo kusihlwa ekuhambeni. Lo mphumela ushiye u-Allister Coetzee ongumqeqeshi wamaBhokobhoko nengcindezi yokwenza kahle emidlalweni yalesi sikwati ezayo ngaphambi kokuphela konyaka.
Isiyonke imiphumela yemidlalo yangempelasonto imi kanjena:- France 18, New Zealand 38; Ireland 38, South Africa 3; Wales 21, Australia 29; England 21, Argentina 8; Scotland 44, Samoa 38; Georgia 54, Canada 22; Italy 19, Fiji 10.
Kwezokuphepha sinikwe amaphuzu alinganayo neNingizimu Afrika...